Чалы: Візіт Коула ў Мінск сарваўся

Пасля акрыку з Масквы.

Лукашэнка настолькі хацеў паўдзельнічаць у першым пасяджэнні трампаўскага Савета міру, што ў яго ўжо былі нарыхтаваныя тэзісы выступлення перад сусветнымі лідарамі, лічыць аналітык Сяргей Чалы у свежым выпуску сваёй аўтарскай перадачы. Тэкст падае «Салідарнасць».

І паколькі дабрацца да Вашынгтона ў яго не атрымалася, выслухоўваць усё гэта давялося дзяржсакратару «Саюзнай дзяржавы» Сяргею Глазьеву, перад якім кіраўнік Беларусі апраўдваўся за кантакты з амерыканцамі.

На думку Чалага, менавіта Дональду Трампу адрасоўваўся тэзіс пра бяздзейнасць ААН: «Таму што раней афіцыйная пазіцыя Беларусі заўсёды заключалася ў тым, каб ганарыцца сваёй роляй сузаснавальніцы гэтай арганізацыі».

А цяпер Лукашэнка, паводле яго ж запэўненняў, гатовы перахрысціцца, калі знойдзецца больш дзейсная структура, бо ААН больш «нічога не вырашае».

Акрамя ўступнага славаслаўя ў неадбыўшагася госця з Мінска былі і парады для прэзідэнта ЗША, упэўнены Чалы. Пачынаючы з Грэнландыі, куды Злучаныя Штаты «маглі добра ўкласціся», але «выклікалі адпрэчанне», да, зразумела, Венесуэлы.

Эксперт нагадаў, што кіраўнік шмат гаварыў пра складаную лагістыку пералёту ў ЗША, маўляў, уся справа ў гэтым, а не ў яго страхах: «Хаця ягоныя словы пра спакойна прыляцець і спакойна адляцець — гэта зноў не пра лагістыку, а пра страхі».

Але самым гарачым момантам у растлумачальнай размове з Глазьевым былі запэўніванні, што Пуцін не забараніў Лукашэнку ляцець да Трампа. Паводле слоў Чалага, выйшла непераканаўча, хоць мінскі саюзнік Крамля і спрабаваў давесці, што ён стараецца не для сябе, а для іх.

Эксперт сцвярджае, што на гэтым тыдні ў Мінск павінен быў прыляцець спецпрадстаўнік Трампа па Беларусі Джон Коул. Але чарговы абмен палітвязняў на новую порцыю уколаў для пахудання нібыта сарваўся менавіта пасля «сяброўскага» акрыку з Масквы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]