Прыніжальны факт для Лукашэнкі і яго міністра

На кароткім павадку асабліва не паманёўруеш.

Пакуль нехта быў надта заняты, распавядаючы, што ў яго з Зімбабвэ ніякіх праблем няма, яго нібыта міністр замежных спраў Рыжэнкаў таксама не паляцеў у Вашынгтон. Ну не паляцеў і не паляцеў. Вялікая справа, так?

Ніхто б і не заўважыў, калі б міністр нібыта замежных спраў сам не звярнуў на гэта ўвагу ўвагу. Але ж звярнуў. Сказаў, што «каментары тут лішнія», але ўсё адно пракаментаваў.

Бо пакрыўдзіўся, што яму не далі амерыканскай візы, хоць «беларускі бок належным чынам аформіў усе неабходныя дакументы».

Ну то бок, спачатку тэлевізары тыднямі расказвалі, што кагосьці запрасілі ў савет міру не для кампаніі, а дзеля яго выдатных геапалітычных вартасцяў. Тлумачылі, як гарант, у якога тэрмін сплывае, будзе вучыць Трампа асновам перадавога сусветнага ўладкавання. А потым яго нібыта міністру не далі амерыканскую візу.

І пагадзіся, што нават нібыта міністру не варта было лішні раз прыцягваць увагу да гэтага факта. Бо калі ты міністр нават нібыта замежных спраў, гэта ўсё адно прыніжальна. Пра такое прыстойныя міністры ўголас не кажуць.

Ды, я цябе малю! Дзе прыстойнасць, а дзе беларускія міністры? Доўгае жыццё ў беларускім тэлевізары атрафуе паняцце пра прыстойнасць і пачуццё гумару разам з ім. А ўяўленні пра ўласную годнасць, наадварот, моцна гіпертрафіруе.

Таму міністр Рыжэнкаў у глыбіні сваёй душы цвёрда ведае, што візу яму не далі не проста так, а з таемным геапалітычным сэнсам. Каб самым фактам ягонай адсутнасці сапсаваць мір ва ўсім свеце.

Хаця я амаль упэўнены, што гэтаму факту ёсць простае абразлівае тлумачэнне. Ніхто не хацеў адмыслова пакрыўдзіць міністра Рыжэнкава. Проста так сталася.

Колькі такіх нібыта міністраў хочуць атрымаць амерыканскую візу. А тут адказнае міжнароднае мерапрыемства, увагі на кожнага міністра не хопіць. Ну засунулі яны там тыя «належным чынам аформленыя дакументы» не ў тую шуфляду. А потым і не ўспомнілі.

Калі б нехта паляцеў сам, то, я амаль упэўнены, нічога падобнага з ягонымі дакументамі не здарылася б. А з нібыта міністрамі ўсякае бывае.

Хаця гэта не здымае прыніжальнасці дадзенага факта для годнасці міністра Рыжэнкава і яго гаранта. Проста скажам — непрыемны факт. Які многае кажа пра месца гаранта ў глабальным сусветным уладкаванні.

Але, калі візу міністру Рыжэнкаву не далі адмыслова, дык усё значна непрыемней. То бок годнасць у гэтым выпадку, можа, і не надта пацярпела, але можа пацярпець шмат чаго іншага.

Бо гэта азначае, што прэзідэнт Трамп адсутнасць гаранта, у якога тэрмін сплывае, на сваім саміце ўсё ж заўважыў. І не проста заўважыў, а яшчэ і пакрыўдзіўся.

І за гэта няхай міністр Рыжэнкаў яшчэ скажа дзякуй, што Трамп выказаў сваю крыўду проста адмовіўшы яму ў візе. А мог жа адправіць міністра Рыжэнкава на канюшню, каб яго там высеклі.

Увогуле, геапалітычны манеўр у гаранта відавочна не задаўся. Але на кароткім павадку асабліва не паманёўруеш.

Тэлеграм-канал «Лісты да дачкі»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]