Пяць краін Еўропы абвінавацілі ўлады РФ у атручванні Навальнага

Афіцыйная заява.

Вялікабрытанія, Францыя, Германія, Нідэрланды і Швецыя выступілі з сумеснай заявай пра тое, што лабараторныя вынікі даюць падставы сцвярджаць пра смерць крытыка Крамля Аляксея Навальнага у выніку атручвання, за чым з вельмі высокай верагоднасцю стаяць расійскія ўлады.

Як паведамляе «Еўрапейская праўда», заяву апублікавалі ўдзень 14 лютага, у дзень другой гадавіны смерці расійскага палітыка ў калоніі.

Заява ад імя пяці краін узгодненая міністрамі замежных спраў і фактычна наўпрост абвінавачвае ўлады РФ у атручванні Навальнага ў турме.

«Вялікабрытанія, Швецыя, Францыя, Германія і Нідэрланды перакананыя, што Аляксея Навальнага атруцілі смяротным таксінам. Гэта выснова нашых урадаў на падставе аналізу ўзораў з цела Аляксея Навальнага. Даследаванні пераканаўча пацвердзілі прысутнасць эпібатыдзіну», — гаворыцца ў тэксце.

Адзначаецца, што гэты нейратаксін утрымліваецца ў ядзе дрэвалазных жаб, якія жывуць у Паўднёвай Амерыцы, і нідзе не сустракаецца ў прыродзе на тэрыторыі Расіі.

«Расія заявіла, што Навальны памёр па натуральных прычынах. Але з улікам таксічнасці эпібатыдзіну і сімптомаў, пра якія паведамлялася, вельмі верагоднай прычынай яго смерці было атручванне. Навальны памёр, знаходзячыся ў турме, то-бок Расія мела сродкі, матывы і магчымасць уразіць яго гэтым ядам», — гаворыцца ў заяве.

Пяць краін адзначаюць, што Расія ўжо неаднаразова дэманстравала ігнараванне міжнароднага права і Канвенцыі аб забароне хімічнай зброі — нагадаўшы, што ў жніўні 2020 года яны выступілі з асуджэннем ужывання «Навічка» для атручвання Навальнага, а да таго расійскія агенты ўжылі гэта рэчыва на тэрыторыі Вялікабрытаніі ў Солсберы, у выніку чаго загінула брытанская грамадзянка.

«Апошнія знаходкі яшчэ раз падкрэсліваюць неабходнасць прыцягнуць Расію да адказнасці за паўторныя парушэнні Канвенцыі аб хімічнай зброі, а ў дадзеным выпадку — Канвенцыі аб біялагічнай і таксічнай зброі. Нашы пастаянныя прадстаўнікі ў Арганізацыі па забароне хімічнай зброі сёння пісьмова звярнуліся да генеральнага дырэктара, каб праінфармаваць яго пра гэта парушэнне з боку Расіі. Мы таксама занепакоеныя тым, што Расія не знішчыла ўсю сваю хімічную зброю», — адзначаюць пяць краін.

Яны заявілі, што выкарыстаюць усе наяўныя інструменты, каб прыцягнуць Расію да адказнасці за такія паводзіны.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]