Важны прэцэдэнт: экс-палітвязень выйграў суд у Польшчы па Дублінскім рэгламенце

Дзякуючы дапамозе праваабаронцаў і еўрадэпутаткі Малгажаты Госеўскай, ён застанецца ў краіне.

Былога палітвязня Алеся Папковіча збіраліся накіраваць з Польшчы ў Літву паводле Дублінскага рэгламента. Сёння, 29 студзеня, польскі суд прыняў рашэнне, якое дазваляе Алесю застацца ў Польшчы, паведамляе праваабарончая ініцыятыва Partyzanka.

Паводле інфармацыі праваабаронцаў, Алеся Папковіча затрымалі ў Беларусі разам з братам 2 верасня 2022 года за ўдзел у пратэсным маршы. Падчас затрымання яго збілі. У снежні таго ж года яго асудзілі на два гады калоніі. Мужчына вызваліўся 10 чэрвеня 2024 года і ў той жа дзень быў эвакуяваны з Беларусі з-за пераследу. Тады была магчымасць аформіць толькі кароткатэрміновую літоўскую візу, паводле якой яго і вывезлі адразу ў Польшчу, дзе ён уз'яднаўся з сям'ёй і падаў заяву на міжнародную абарону. Тым не менш Упраўленне па справах замежнікаў прыняло рашэнне перадаць справу на разгляд Літве, ужыўшы Дублінскі рэгламент.

Дублінскі рэгламент — гэта пагадненне, якое вызначае, якая краіна ЕС павінна разглядаць заяву аб міжнароднай абароне. У агульным выпадку гэта краіна, якая выдала замежніку дакумент для ўезду ў ЕС або дазвол на знаходжанне. А калі такога дакумента не было — краіна першага ўезду ў ЕС.

Але рэгламент дазваляе рабіць выключэнні: улічваць гуманітарныя абставіны або сямейныя сувязі. Тады справа накіроўваецца той дзяржаве, з якой шчыльна звязаны заяўнік або дзе жывуць яго або яе муж/жонка, непаўналетнія дзеці або бацькі непаўналетніх.

13 снежня 2025 года ў складзе групы з 123 палітвязняў быў вызвалены і выдвараны з Беларусі брат Алеся Ян Папковіч, які таксама цяпер жыве ў Польшчы.

Як патлумачылі ў ініцыятыве Partyzanka, юрыстка якой Ганна Матіеўская падрыхтавала абскарджанне рашэння Упраўлення па справах замежнікаў, суд пагадзіўся з сур'ёзнымі працэдурнымі парушэннямі ў справе і абгрунтаваннем індывідуальнай сітуацыі Алеся.

На пасяджэнні прысутнічала кіраўніца дэлегацыі Еўрапарламента па сувязях з Беларуссю, еўрадэпутатка ад партыі «Права і справядлівасць» Малгажата Госеўска, якая актыўна абараняе беларусаў, што апынуліся ў складанай сітуацыі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]