Шматдзетны мінчанін прыдумаў незвычайны від заробку: ён збіраў «штрафы» з аматараў выпіць на вуліцы

Што было далей.

На разгляд у суд накіравана крымінальная справа ў дачыненні да 37‑гадовага раней неаднаразова судзімага жыхара сталіцы, якога абвінавачваюць у самавольным прысваенні ўлады службовай асобы і махлярстве, паведамляе дзяржагентства «Минск-Новости» са спасылкай на пракуратуру Цэнтральнага раёна сталіцы.

Як піша агенцтва, аднойчы абвінавачаны вяртаўся з падпрацоўкі і на праспекце Пераможцаў убачыў падпітога незнаёмца. Ён падышоў да яго, прадставіўся супрацоўнікам міліцыі і паведаміў, што мужчына, знаходзячыся ў стане алкагольнага ап’янення ў грамадскім месцы, учыняе правапарушэнне, за што яму пагражае пакаранне аж да адміністрацыйнага арышту. Таксама псеўдаміліцыянер прапанаваў альтэрнатыву: каб не ехаць у Цэнтральнае РУУС для «далейшага разбіральніцтва», грамадзянін можа аплаціць штраф на месцы.

Паколькі пры сабе ў «парушальніка» грошай не аказалася, ён прапанаваў самазванцу паехаць да яго дадому — на вуліцу Лесі Украінкі. У кватэры знаходзіўся яшчэ і брат «затрыманага», якому фігурант таксама прадставіўся міліцыянерам, сказаўшы, што яго сваяк павінен аплаціць штраф за ўчыненае правапарушэнне ў памеры 1 базавай велічыні. Аферысту перадалі 45 рублёў, пасля чаго той пайшоў. Грошы ён выдаткаваў на прадукты і асабістыя патрэбы.

Наступнай раніцай фігурант ізноў завітаў па тым самым адрасе. Яму адчыніла дзверы маці «аштрафаванага». Псеўдаміліцыянер сказаў, што прыйшоў пракантраляваць «правапарушальніка», але таго дома не аказалася — пажылая жанчына выказала здагадку, што сын дзесьці п’е, хаця літаральна напярэдадні вярнуўся з ЛТП. Зламыснік паведаміў, што накіруе яго на прымусовае лячэнне ад алкагольнай залежнасці або на тры месяцы на працу ў мужчынскае падвор’е Свята-Елісавецінскага манастыра. Пасля гэтага ён распавёў пра перавагі выбару другога варыянту, і жанчына ў выніку напісала заяву аб накіраванні сына ў манастыр. А самазванец запатрабаваў аплаціць 105 рублёў за койка-месца, паабяцаўшы на наступны дзень прыйсці па сына, чаго, вядома, не зрабіў.

Праз некаторы час жанчына сустрэла на вуліцы свайго ўчастковага і расказала яму пра ўсё. Той адказаў, што яна мела справу з махляром, і параіў напісаць заяву.

Аналагічным спосабам абвінавачаны падмануў яшчэ аднаго падпітога грамадзяніна, узяўшы з яго «штраф» у памеры двух базавых велічынь. Размяняўшы грошы, мужчына перадаў фігуранту 90 рублёў, а таксама паведаміў яму свае персанальныя звесткі і нумар мабільнага тэлефона, каб той выслаў яму копію пратакола. Дарэчы, таго мужчыну аферыст таксама выпадкова сустрэў на праспекце Пераможцаў.

Праз некалькі дзён махляр звязаўся з ім і паведаміў, што суд наклаў на грамадзяніна спагнанне ў выглядзе пяці сутак арышту або штрафу ў памеры пяці базавых велічынь — на выбар. Не разбіраючыся ў юрыспрудэнцыі, мужчына пагадзіўся дааплаціць астатнюю суму «штрафу» і перавёў зламысніку на банкаўскую картку яшчэ 130 рублёў, якія той выдаткаваў на аплату заняткаў дачкі вакалам.

Калі махлярскія схемы раскрыліся, у дачыненні да самазванца ўзбудзілі чарговую крымінальную справу.

— Абвінавачаны жанаты, на ўтрыманні мае чатырох дзяцей, нідзе афіцыйна не працуе, раней неаднаразова прыцягваўся да крымінальнай адказнасці, у тым ліку за ўчыненне маёмасных злачынстваў, — пракаментаваў намеснік пракурора Цэнтральнага раёна Віктар Шубіч. — Яму прад’яўлена абвінавачанне ў ўчыненні злачынстваў, прадугледжаных ст. 382 КК (Самавольнае прысваенне звання або ўлады службовай асобы) і ч. 2 ст. 209 КК (Махлярства). Віну грамадзянін цалкам прызнаў.

Абвінавачаны ўтрымліваецца пад вартай у следчым ізалятары.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]