МАЗ і новая тэорыя змовы

Чаму беларускія аўтобусы гараць?

Выкрытымі змовамі ў Беларусі даўно ўжо нікога не здзівіш. Хто толькі за гэтыя гады не рабіў замах на беларускую стабільнасць. Атручаныя пацукі ў каналізацыі, 150 джыпаў з кулямётамі на літоўскай мяжы і нават драпежныя “Птушкі Бацькаўшчыны”. І чым мацней становіцца стабільнасць, тым больш вынаходлівыя вынаходнікі змоў, піша planbmedia.io.

Чаму беларускія аўтобусы гараць? На гэтае, здавалася б, рытарычнае пытанне ёсць вельмі канкрэтны адказ. Бо беларускія аўтобусы проста так гарэць не будуць. Не тыя гэта аўтобусы, каб проста так гарэць. Калі аўтобусы гараць, значыць гэта некаму трэба.

За першую палову гэтага года продажы аўтобусаў МАЗ у Расеі ўпалі ўдвая ў параўнанні з мінулым. А вось летась яны таксама амаль удвая ўпалі. А МАЗ толькі што пабудаваў новы аўтобусны завод і ўсе гэтыя новыя аўтобусы трэба кудысьці падзець.

Таму для загадкавага феномену самазагаранняў беларускіх аўтобусаў трэба было знайсці тлумачэнне. Прычым тлумачэнне: "беларускія аўтобусы гараць праз некаторыя канструктыўныя асаблівасці" відавочным чынам не пасуе. З такім тлумачэннем шмат аўтобусаў не прадасі. Іншая справа, як патлумачыў намесніку гендырэктара МАЗа рэдактар "Мінскай праўды" Кірыл Казакоў – шкодніцтва канкурэнтаў. Шкодніцтва яшчэ калектывізацыю падрывала.

"Супраць вас яшчэ і ваююць па-чорнаму. Таму што падпаленыя МАЗы... я проста здзіўляюся, што МАЗы не гараць нідзе, акрамя Санкт-Пецярбурга. У вас сумленны тэндар, а ваююць супраць вас не па-сумленнаму”.

Дзеля справядлівасці трэба сказаць, што беларускія МАЗы наогул гараць не толькі ў Санкт-Пецярбургу. У Новасібірску і Саратаве, у Казані і Самары, Ліпецку і Яраслаўлі беларускія аўтобусы гарэлі ані не горш. Што яшчэ горш, яны гарэлі нават на роднай беларускай зямлі: у Менску, Гомелі ці, скажам, Пінску.

Наіўны чалавек мог бы падумаць, што гэтыя факты злёгку падрываюць тэорыю змовы, паколькі парушаюць прынцып адзінства месца дзеяння. І што справа не толькі ў інтрыгах канкурэнтаў. Што канструкцыйныя асаблівасці беларускіх аўтобусаў таксама трошкі вінаватыя.

Але кожны спецыяліст тэорыі змовы ведае, што тэорыю змовы немагчыма падарваць фактамі. Усе факты, якія супярэчаць тэорыі, яе толькі ўмацоўваюць.

І калі беларускія аўтобусы гараць не толькі ў Санкт-Пецярбургу, то гэта не значыць, што тэорыя няправільная. Гэта значыць, што шчупальцы змовы супраць беларускіх аўтобусаў раскінуліся настолькі шырока, што праніклі нават у Беларусь. Так што гендырэктар МАЗа з тэорыяй спрачацца не стаў.

“Ваююць, і як вы сказалі, і не па-сумленнаму", — сумна пагадзіўся ён.

Ну, таму што ж аўтобусы ж выдатныя. А выдатныя аўтобусы самі па сабе гарэць не будуць. Іншая рэч, калі рэгулярныя самазагаранні беларускіх аўтобусаў ладзяць канкурэнты. Тады МАЗ атрымліваецца ні ў чым не вінаваты, а легендарная беларуская якасць засталася незаплямленай. Прынамсі ў беларускім тэлевізары.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]