«Партманэт» Лукашэнкі прывозіць у Беларусь забароненае піва з Еўропы
8- 11.02.2025, 14:28
- 11,828
Контрсанкцыі, уведзеныя рэжымам, Цяцерыну не перашкода.
У 2024 і 2025 гадах звязаная з Сяргеем Цяцерыным "Лагістычная кампанія Усход" завезла больш за 310 тысяч бутэлек піва з Літвы, Чэхіі і Эстоніі пад брэндамі: Livu, Karlova Krcma, Karl Friedrich і Budweiser, піша «Бюро».
Пры гэтым піва з Латвіі, Літвы, Чэхіі, Польшчы і Эстоніі забаронена ўвозіць у Беларусь згодна з так званымі контрсанкцыямі, якія ўвялі ўлады Беларусі. Але, як бачым, для набліжанага да Лукашэнкі бізнэсоўца гэта не стала перашкодай.
Ужо не першы раз Цяцерын пастаўляе ў Беларусь забароненую "контрсанкцыямі" прадукцыю. Раней “Бюро” расказвала пра розныя прысмакі і закускі, якія кампанія, звязаная з Цяцерыным, возіць у Беларусь. Сярод іх чыпсы Pringles, жэлацінкі Haribo, шакалад Lindt і Ritter Sport і многае іншае. Але апетыты бізнэсоўца растуць, і адны прысмакі іх ужо не задавальняюць.
Для паставак санкцыйнай прадукцыі бізнэсовец выкарыстоўвае "Лагістычную кампанію Усход". Кампанія запісана на Аляксея Мацвеева - супрацоўніка цецярынскай кампаніі "БелГлобалСтарт". Сам Сяргей Цяцерын з 2021 года знаходзіцца пад санкцыямі ЕЗ як “партманэт” Лукашэнкі.
Даход "Лагістычнай кампаніі Усход" у 2023 годзе склаў 158 мільёнаў рублёў. Чысты прыбытак - 8 мільёнаў рублёў.
Забарона на "ўвоз і рэалізацыю асобных відаў тавараў і паслуг з непрыязных краін" была ўведзеная ў снежні 2021 года і штогод пашыралася і прадаўжалася. Апошні раз яе прадоўжылі 30 снежня 2024 года. Асобна ў дакуменце адзначаны тавары, якія паходзяць з Латвіі, Літвы, Эстоніі, Польшчы і Чэхіі - "асабліва непрыязных краін".
Іранічна, што ўжо 14 студзеня "Лагістычная кампанія Усход" атрымала дэкларацыі адпаведнасці на тры партыі піва з Літвы агульным аб'ёмам 115 тысяч бутэлек.
Атрымліваецца, што Сяргей Цяцерын дзякуючы “контрсанкцыям” заняў нішы, якія вызваліліся ад канкурэнтаў, скарыстаўшыся для гэтага набліжанасцю да Лукашэнкі.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
