Лондан прадставіў «Атлантычны бастыён» для барацьбы з Расіяй пад вадой

Праект прадставіў міністр абароны Каралеўства.

Вялікабрытанія пачала працу над новай тэхналогіяй Atlantic Bastion («Атлантычны бастыён») з-за росту актыўнасці расійскага падводнага флоту. Праект прадставіў міністр абароны каралеўства Джон Хілі падчас візіту на ваенна-марскую базу ў Портсмуце.

Праект стаў часткай рэалізацыі Стратэгічнага абароннага агляду і, як адзначае Лондан, з’яўляецца адказам на «ўзмацненне актыўнасці расійскіх падводных лодак». У брытанскім абаронным ведамстве паведамілі, што ў апошнія тыдні каля берагоў каралеўства быў зафіксаваны рух расійскага разведвальнага судна «Янтар». Ваенная разведка Вялікабрытаніі таксама лічыць, што Расія «мадэрнізуе свой флот для магчымых атакаў на падводныя кабелі і трубаправоды».

Паводле даных абароннага ведамства, «Атлантычны бастыён» аб’яднае аўтаномныя надводныя і падводныя апараты, сістэмы штучнага інтэлекту, лічбавую інфраструктуру, ваенныя караблі і патрульную авіяцыю. Праграма дапаможа стварыць гібрыдныя ваенна-марскія сілы, здольныя выяўляць, адсочваць і працідзейнічаць патэнцыйным пагрозам на вялікіх адлегласцях. Мяркуецца, што гэтая тэхналогія абароніць брытанскія падводныя лодкі ў Паўночнай Атлантыцы.

У 2024 годзе ў распрацоўку і выпрабаванні процілодкавых датчыкаў у межах праграмы было ўкладзена £14 млн ($10,5 млн), пры гэтым суадносіны прыватных інвестыцый да дзяржаўных склалі 4:1, растлумачылі ў брытанскім абаронным ведамстве. У конкурсе ўдзельнічалі 26 кампаній з Вялікабрытаніі і Еўропы, з іх 20 прадпрыемстваў ужо прадставілі дэманстрацыйныя ўзоры тэхналогій. Паспяховыя праекты перайдуць да стадыі пашыраных выпрабаванняў у бліжэйшыя тыдні, а разгортванне тэхналогіі на вадзе плануецца ажыццявіць ужо ў наступным годзе.

Па словах Хілі, хуткі прагрэс падкрэслівае гатоўнасць абароннай прамысловасці падтрымаць трансфармацыю Каралеўскага флоту Вялікабрытаніі. «Новая эпоха пагроз патрабуе новай эпохі абароны, і мы павінны хутка ўкараняць інавацыі ў ваенным тэмпе, каб захоўваць перавагу на поле бою», — падкрэсліў ён.

У канцы верасня экс-кіраўніца брытанскага разведвальнага ўпраўлення MI5 (якое займаецца контрразведкай) Эліза Мэнінгэм-Булер заявіла, што Вялікабрытанія, верагодна, ужо знаходзіцца ў стане вайны з Расіяй. Паводле яе слоў, гэта іншы від вайны, які ўключае кібератакі і шырокамаштабную разведвальную дзейнасць.

Лондан у чэрвені абвясціў пра пераход краіны ў рэжым «гатоўнасці да вайны». Акрамя таго, урад Вялікабрытаніі анансаваў павелічэнне інвестыцый у абаронную вытворчасць на £1,5 млрд (каля $2 млрд).

Тым часам Еўракамісія ў сакавіку прадставіла план па перавузбраенні Еўрасаюза (ReArm Europe) агульным коштам €800 млрд. Тады ж Еўрасаюз прадставіў «Белую кнігу аб еўрапейскай абароне — «Гатоўнасць-2030». У прыватнасці, у кнізе пералічваюцца прычыны, з-за якіх ЕС вымушаны нарошчваць абаронныя закупкі. Сярод іх — «фундаментальная пагроза» з боку Расіі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]