ФІБА працягнула ізаляцыю беларускіх баскетбалістаў

Міжнародныя турніры застаюцца закрытымі для спартсменаў рэжыму.

Міжнародная федэрацыя баскетбола (ФІБА) працягнула адстараненне зборных і клубаў з Беларусі і РФ ад спаборніцтваў пад сваёй эгідай, паведаміла прэс-служба арганізацыі.

Рашэнне было прынята 5 снежня на паседжанні Цэнтральнага савета ФІБА ў швейцарскай камуне Мі.

Пры гэтым, як адзначаецца, адстараненне працягнецца да паседжання выканаўчага камітэта ФІБА, запланаванага на сярэдзіну лютага 2026 года.

«Цэнтральны савет таксама пацвердзіў, што, калі сітуацыя дазволіць, ФІБА будзе гатовая прыняць надзвычайныя меры, каб забяспечыць удзел гульцоў абедзвюх федэрацый у Алімпійскіх гульнях 2028 года, улічваючы немагчымасць удзелу ў буйных турнірах ФІБА 2026 і 2027 гадоў, дзе ўжо ідзе кваліфікацыйны адбор», — гаворыцца ў паведамленні.

Санкцыі ў дачыненні да беларускага і расійскага баскетбола неаднаразова працягваліся пасля ваеннага ўварвання РФ ва Украіну. Папярэдні раз гэта адбылося 15 мая 2025 года.

19 мая 2023 года стала вядома, што беларускія і расійскія клубы не змогуць заявіцца для ўдзелу ў міжнародных турнірах пад эгідай еўрапейскага аддзялення ФІБА-Еўропа.

21 красавіка паведамлялася, што выканаўчы камітэт ФІБА-Еўропа аднагалосна прыняў рашэнне не дапускаць мужчынскія зборныя Беларусі і Расіі да кваліфікацыі Еўрабаскета-2025.

1 сакавіка 2022 года чатыры беларускія клубы — мужчынскія «Цмокі» (Мінск) і «Барысфен» (Магілёў), жаночыя «Гарызонт» (Мінск) і «Алімпія» (Гродна) — былі выключаныя са спаборніцтваў у еўрапейскіх клубных лігах.

18 мая таго ж года выканаўчы камітэт ФІБА забараніў праводзіць свае спаборніцтвы на тэрыторыі Беларусі і РФ, а таксама выключыў каманды гэтых краін са сваіх турніраў. Беларускія зборныя былі адхілены ад удзелу ў адборачных матчах мужчынскага чэмпіянату свету-2023, жаночага чэмпіянату свету-2022, чэмпіянату свету сярод дзяўчат (U-17), а таксама ў турнірах 3x3 сярод мужчын і жанчын.

28 лютага 2022-га, праз чатыры дні пасля поўнамаштабнага ўварвання расійскай арміі на тэрыторыю Украіны, Міжнародны алімпійскі камітэт (МАК) заклікаў міжнародныя спартыўныя федэрацыі не дапускаць да спаборніцтваў атлетаў з Расіі і Беларусі. Гэта рэкамендацыя была неадкладна і масава прынята да выканання.

28 сакавіка 2023-га па выніках пасяджэння выканаўчага камітэта ў Лазане (Швейцарыя) МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. Шэраг федэрацый выканаў гэтую рэкамендацыю, дзякуючы чаму абмежаваная колькасць беларусаў удзельнічала ў летніх Алімпійскіх гульнях 2024 года.

Рэкамендацыя МАК не распаўсюджваецца на камандныя віды спорту, паколькі «каманды атлетаў з расійскім або беларускім пашпартам не разглядаюцца».

Старшынём Беларускай федэрацыі баскетбола з 2014 года з'яўляецца цяперашні міністр замежных спраў Максім Рыжанкоў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]