«Маю ніхто не ведае, нават я»

Што беларусы думаюць пра тое, што ў пашпартах і відах на жыхарства цяпер пазначаюць групу крыві.

У беларускіх пашпартах і ВНЖ цяпер будуць указваць групу крыві іх уладальнікаў, але толькі па жаданні. У Мінздароўі адзначылі, што пазнака з указаннем групы крыві ўжо больш за 40 гадоў ставілася ў дакументах па жаданні людзей. Беларусы ў сацсетках актыўна каментуюць гэтую навіну. Некаторыя падтрымліваюць новаўвядзенне, іншыя выступаюць супраць, трэція сумняваюцца, што пры вызначэнні групы крыві не дапусцяць памылку, піша BGmedia.

Пастанова Мінздароўя №192 была апублікаваная на прававым інтэрнэт-партале 29 лістапада. Дакумент распрацаваны з улікам патрабаванняў указа Лукашэнкі аб дакументаванні насельніцтва.

Пазнака аб групе крыві будзе выглядаць як штамп фіялетавага або чорнага колеру. Там будзе пазначаная група па сістэме АВ0 і рэзус-фактар. Запаўняць і завяраць подпісам штамп будуць у бальніцах і паліклініках.

Таксама прадстаўнік арганізацыі аховы здароўя будзе ўносіць інфармацыю ў адпаведны журнал аб рэгістрацыі такіх пазнак.

Пазнака аб групе крыві можа быць ануляваная, калі выявяцца няправільныя або недакладныя звесткі. Тады на ёй паставяць штамп «Анулявана».

«У дакуменце засталася норма пра тое, што штамп аб групе крыві можа быць пастаўлены толькі па жаданні грамадзяніна ў пашпарт або від на жыхарства. Але, важна адзначыць, што пазнака не ўносіцца ў ідэнтыфікацыйную карту грамадзяніна [ID-карту], дыпламатычныя, службовыя і біяметрычныя пашпарты, а таксама іншыя дакументы, прызначаныя для выезду з Рэспублікі Беларусь і (ці) ўезду ў яе», — патлумачылі ў Мінздароўі.

У ведамстве дадалі, што «такая пазнака ўжо больш за 40 гадоў ставілася ў дакументах па жаданні грамадзян, і норма засталася ў абноўленай пастанове.

«Яна носіць толькі агульнаінфармацыйны характар для звесткі самога грамадзяніна», — падкрэслілі ў Мінздароўі.

У ведамстве лічаць, што «ў сучасных умовах, пры неабходнасці пералівання кампанентаў крыві, група крыві вызначаецца перад кожнай трансфузіяй».

Што беларусы думаюць пра тое, што ў пашпартах будуць пазначаць групу крыві

Беларусы ў сацсетках актыўна каментуюць навіну пра штампы з пазначэннем групы крыві. Некаторыя выступаюць супраць у тым ліку таму, што не хочуць раскрываць асабістую інфармацыю: «Я супраць. Гэта мае персанальныя даныя і маё здароўе! У людзей трэба пытацца!».

Таксама беларусы лічаць, што гэта перагрузіць сістэму аховы здароўя. Ды і цяпер медыкі памыляюцца пры вызначэнні групы крыві:

«Які сэнс? Гэта толькі цяпер перагрузіць сістэму аховы здароўя. Яе трэба вызначыць, а значыць — загрузіць лішняй працай лабараторыі. Іншы момант: па правілах усё роўна давядзецца нанова браць кроў. У гісторыі хваробы павінна быць свежае (на момант паступлення) вызначэнне групы. Калі патрабуецца пераліванне, то патрэбныя яшчэ дадатковыя даследаванні».

«Дык навошта тады яна ў пашпарце, калі можа быць памылка?».

«Не пытанне, толькі хай спачатку навучацца нармальна вызначаць. Мне ў 19 гадоў вызначылі 3+, у 22 гады — 3−, у 35 гадоў — 3+».

«Калі муж служыў, у яго стаяла 4+ на форме, але ў выніку ён сам не ведае, якая ў яго група крыві. Спачатку была 4+, потым 2+. Армія — гэта весела».

У ID-картах групу крыві пазначаць не будуць. Беларусы адзначаюць, што ходзяць менавіта з імі. У некаторых нават няма пашпартоў. А калі і ёсць, то яны не носяць іх з сабой. І тады сэнсу ад гэтых штампаў з групай крыві няма:

«Хутка ў паловы насельніцтва будзе ID-карта. Калі вы збіраецеся штампы ставіць? На двары 21-ы век».

«У якіх пашпартах? Цяпер жа пашпарты па заканчэнні тэрміну дзеяння ўжо мяняюць на ID-карты».

«Дык ужо выдалі ідэнтыфікацыйныя карты, якія нафіг пашпарты?»

«Абавязковае нашэнне пашпартаў — толькі ў ваенны час. Нашто гэтая пазнака, калі дакументы з сабой ніхто не носіць?».

«Я заўсёды ношу з сабой пашпарт».

«Не трэба гаварыць за ўсіх. Я сама заўсёды нашу і ведаю многіх, хто носіць. Ніколі не ведаеш, калі можа спатрэбіцца».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]