FT: Трохзначная інфляцыя ўдарыла па сябру Лукашэнкі

Жыхары Венесуэлы не супраць, каб ЗША ўмяшаліся і адхілілі ад улады кіраўніка.

Венесуэла сутыкнулася з трохзначнай інфляцыяй, што ўзмацняе ціск на яе аўтарытарнага кіраўніка Нікаласа Мадуры. Усё гэта адбываецца на фоне таго, як караблі ВМС ЗША тапяць меркаваныя караблі наркатрафікантаў ля ўзбярэжжа краіны, піша The Financial Times.

Як паведамляе FT, за апошні год мясцовая валюта — балівар — абясцэнілася больш як на 400% адносна долара. Міжнародны валютны фонд (МВФ) прагназуе, што інфляцыя дасягне 270% да канца года — гэты паказчык будзе самым высокім у свеце. У 2024 годзе 86 працэнтаў венесуэльцаў знаходзіліся за рысай беднасці, падлічыў Венесуэльскі фінансавы назіральны цэнтр. Многія жыхары багатай на нафту краіны ўсё больш адчаююцца — яшчэ свежыя ўспаміны пра шасцізначную гіперінфляцыю 2016−2019 гадоў, якая прымусіла мільёны з’ехаць за мяжу.

Працоўныя, што атрымліваюць мінімальны заробак, цяпер зарабляюць каля 60 цэнтаў у месяц: курс балівара, паводле дадзеных Цэнтральнага банка, упаў з 43 за долар год таму да 228 на мінулым тыдні.

Прафесар эканомікі Цэнтральнага ўніверсітэта Венесуэлы Хасэ Герра лічыць, што змрочныя эканамічныя перспектывы ствараюць для Мадуры не меншую пагрозу, чым патэнцыйныя ваенныя дзеянні з боку ЗША: «Чым глыбей крызіс, тым гучней людзі патрабуюць перамен».

Левы ўрад стрымаў мінулую крызісную гіперінфляцыю за кошт паслаблення кантролю над цэнамі і маўклівай згоды на выкарыстанне амерыканскага долара ў паўсядзённых разліках. Напярэдадні выбараў летась Цэнтральны банк Мадуры падтрымліваў балівар, трацячы мільярды долараў з рэзерваў. Але пасля галасавання, вынікі якога апазіцыя лічыць сфальсіфікаванымі, цэнтральны банк скараціў валютныя інтэрвенцыі, а Мадура пасадзіў у турму пратэстоўцаў і апазіцыйных дзеячоў. З таго часу ён узмацніў меры супраць людзей, якія паведамляюць пра плачэвны стан эканомікі: незалежных эканамістаў і тых, хто публікаваў курсы чорнага рынку абмену валют, арыштоўвалі.

МВФ прагназуе, што гадавая інфляцыя ўзляціць вышэй за 680 працэнтаў у наступным годзе. Цэнтральны банк ужо спыніў публікацыю дадзеных пра інфляцыю. Долары на вуліцах у дэфіцыце, і венесуэльцы абапіраюцца на крыптавалюты, каб купляць тавары і адкладаць зберажэнні.

Тым часам прынамсі 69 чалавек былі забітыя падчас як мінімум 17 удараў ЗША па караблях, якія Злучаныя Штаты лічаць звязанымі з дзейнасцю венесуэльскіх наркакартэляў. У мінулым месяцы Трамп пагражаў Мадуры ўдарамі па наземных аб’ектах, але на гэтым тыдні сказаў, што «не быў бы схільны» сцвярджаць, што гэта яго план. Тым часам найбуйнейшы авіяносец ЗША, USS Gerald R Ford, выйшаў з Міжземнага мора, каб далучыцца да амерыканскай флатыліі ля берагоў Венесуэлы.

Мадура лічыць, што разгортванне амерыканскіх сіл у рэгіёне накіравана на тое, каб зняць яго з пасады. «Усё, што яны робяць супраць Венесуэлы, — каб апраўдаць вайну, змену рэжыму і ўкрасьці нашае велізарнае нафтавае багацце», — заявіў ён на нядаўняй сустрэчы з чыноўнікамі.

Але апытанне венесуэльцаў, што жывуць у краіне і па-за ёй, апублікаванае на гэтым тыдні мясцовай сацыялагічнай службай Es Noticia, паказала, што толькі 20 працэнтаў вінавацяць у эканамічных бедах краіны санкцыі ЗША — супраць 33 працэнтаў у верасні.

«Калі грынга хочуць умяшацца, няхай ужо ўмешваюцца, — перадае FT словы аднаго з наведвальнікаў супермаркета. — Мы спрабавалі галасаваць, нас пасадзілі ў турму, і цяпер мы ледзь зводзім канцы з канцамі — што нам яшчэ застаецца рабіць?»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]