РПЦ з пачатку вайны рэзка павысіла цэны на рытуалы

Найбольш падаражэлі хрышчэнне, вянчанне і адпяванне.

Памер «добраахвотных ахвяраванняў», устаноўлены на рытуалы і абрады ў расійскіх цэрквах, павялічыўся амаль на 40% з пачатку паўнамаштабнай вайны ва Украіне, падлічылі The Moscow Times. Найбольш падаражэлі хрышчэнне, вянчанне і адпяванне.

Карэспандэнт The Moscow Times вывучыў афіцыйныя сайты 140 цэркваў і храмаў па ўсёй Расіі, а таксама іх архіўныя версіі, і падлічыў, як змяніліся «рэкамендаваныя добраахвотныя ахвяраванні» на розныя віды царкоўных трэбаў, пазначаных на сайтах, з 2020 года да сённяшняга дня. У выбарку трапілі храмы з 70 рэгіёнаў. У 19 суб'ектах федэрацыі сайты праваслаўных цэркваў адшукаць не ўдалося — гэта пераважна рэгіёны з перавагай мусульманскага насельніцтва (Чачня, Інгушэтыя, Кабардзіна-Балкарыя, Карачаева-Чаркесія, Татарстан).

Памер ахвяраванняў на царкоўныя трэбы з даваеннага часу змяніўся ў 91 царкоўнай установе (65%). Найбольш выраслі цэны ў Жаночым манастыры іконы Божай Маці ў Калуге (на 345%). Больш як у 2 разы памеры рэкамендаваных ахвяраванняў выраслі ў Багаяўленскім мужчынскім манастыры Пермскага краю. На 192% памеры ахвяраванняў на трэбы выраслі ў адной з найстарэйшых абіцеляў Урала — Свята-Пакроўскім жаночым манастыры, заснаваным у XVII стагоддзі. У сямі царкоўных установах з выбаркі да вайны памеры рэкамендаваных ахвяраванняў не былі ўказаныя, але цяпер яны з’явіліся.

Найбольш падаражэлі найбольш запатрабаваныя абрады: цэны на хрышчэнне выраслі ў сярэднім у 1,5 раза, вянчанне падаражэла на 107%, а адпяванне — на 71%. Рэкамендаваныя ахвяраванні на аднаразовыя трэбы (малебен, паніхіда, падача запісак аб здароўі або аб супакоі і гэтак далей) павялічыліся амаль на 56%. Таксама выраслі памеры рэкамендаваных ахвяраванняў на саракауст — штодзённае малітоўнае памінанне, — амаль на 47%.

Найвышэйшае ахвяраванне ўстаноўлена на трэбу «Вечнае памінанне» ў Жаночым манастыры «Уміленне» ў ХМАА, паслуга абыдзецца прыходжаніну ў 50 тысяч рублёў. Параўнаць з памерам ахвяравання ў тым жа манастыры за тую ж трэбу нельга, бо ў 2021 годзе сярод абрадаў на сайце храма яе не было. Аднак сярэдні кошт абраду да вайны складаў каля 10 тысяч рублёў, то бок у 5 разоў меншы.

Пратайерэй, былы клірык Іспана-Партугальскай япархіі РПЦ Андрэй Кордочкін лічыць, што цэны ў цэрквах растуць не з волі мясцовых святароў, а паводле распараджэння з япархіі.

«У Расіі ўсе храмы, акрамя, уласна кажучы, выдаткаў, робяць адлічэнні ў япархіі. І гэтыя адлічэнні маюць уласцівасць расці. І калі чалавек адмаўляецца там удзельнічаць у гэтай схеме або кажа, што ён не можа, ну, значыць, у яго ёсць рызыка таго, што ён проста страціць месца служэння. І зразумела, што для многіх людзей, калі павялічваецца, так бы мовіць, іх расходная частка, то яны не бачаць ніякага іншага выйсця, акрамя як павышаць даходную».

Аднак ёсць і аб’ектыўныя прычыны, адзначае Кордочкін, сярод якіх ён называе інфляцыю і рост тарыфаў на камунальныя паслугі, якія храм аплачвае, як і любая арганізацыя. Накопленая інфляцыя з 2022 года перавысіла 30%, паводле дадзеных Расстата.

У кастрычніку жыхары Капейска паскардзіліся, што ў мясцовым храме кошт свечак, службаў і хрышчэння за год павялічыўся амаль у два разы. «Убачыла прэйскурант, ад якога ашалела. То бок 2 гады таму я плаціла 100 рублёў за адно імя на год. Я давала 1000 рублёў, пісала 10 імёнаў. Усё, каб памаліліся. Але цяпер 5000 за адно імя на год. Наколькі я абалдзела. Вось настолькі», — распавядала жыхарка Капейска Настасся. Настаяцель храма айцец Віктар тлумачыў, што «ва ўсёй япархіі цэны аднолькавыя» і што іх усталёўвае не сам храм. У Чалябінскай япархіі дадалі, што «без добраахвотных ахвяраванняў служыцелі царквы не змогуць плаціць за камунальныя паслугі і падтрымліваць храм у належным стане».

Скаргі на рост цэн у храмах розных рэгіёнаў рэгулярна з’яўляюцца ў сацсетках, а ў некаторых абласцях япархія загадзя папярэджвае пра будучае павышэнне цэн. А ў верасні гэтага года настаяцель іркуцкага храма Сяргей Кульпінаў замест цэн на асобныя паслугі прапанаваў абкласці расіян царкоўнай дзесяцінаю — абавязковымі ахвяраваннямі на ўтрыманне храма і святароў. Праўда, кіраўнік Сінодальнага аддзела па ўзаемаадносінах Царквы з грамадствам і СМІ Уладзімір Легойда адзначыў, што меркаванне Кульпінава не з’яўляецца афіцыйнай пазіцыяй РПЦ, і «асобны святар, нават той, хто мае пэўную вядомасць, не ўпаўнаважаны гаварыць ад імя ўсёй Рускай Праваслаўнай Царквы і выступаць з якімі-небудзь афіцыйнымі заявамі».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]