Сенатары і кангрэсмены звярнуліся да дзяржсакратара ЗША ў сувязі з сітуацыяй у Беларусі

Яны заклікалі адміністрацыю Трампа працягваць працу па вызваленні палітвязняў.

Амерыканскія сенатары і кангрэсмены 17 лістапада звярнуліся з адкрытым лістом да дзяржсакратара ЗША Марка Рубіо з заклікам працягваць працу па вызваленні палітвязняў у Беларусі і праяўляць асцярожнасць у будучых перамовах з рэжымам Аляксандра Лукашэнкі, які падтрымлівае кіраўніка Расіі Уладзіміра Пуціна.

Ліст падпісаны сенатарамі Пітэрам Уэлчам і Джонам Керцісам, а таксама прадстаўнікамі Кангрэса Стывам Коэнам і Джо Ўілсанам. У ім заканадаўцы падзякавалі адміністрацыі Трампа за вызваленне зняволеных 21 чэрвеня, 11 і 16 верасня.

«Мы выказваем удзячнасць адміністрацыі за яе працу ў гэтым кірунку, уключаючы намаганні генерал-лейтэнанта Кейта Келлога, намесніка спецыяльнага пасланніка Джона Коала і намесніка памочніка дзяржсакратара Крыстафера Сміта. <�…> Па меры таго як адміністрацыя працягвае ўзаемадзеянне з гэтым нелегітымным рэжымам, мы заклікаем праяўляць асцярожнасць, каб любыя поспехі ў вызваленні палітычных зняволеных не былі падарваныя працяглай практыкай адвольных затрыманняў з боку ўлады [Беларусі]», — гаворыцца ў лісце да Рубіо.

Заканадаўцы падкрэслілі неабходнасць пастаяннай пільнасці, адзначыўшы, што ўступкі Лукашэнкі могуць быць тактыкай для адцягнення ўвагі ад сталай падтрымкі Расіяй вайны ва Украіне.

«Перамовы з рэжымам Лукашэнкі непазбежна спрыяюць яго імкненню атрымаць легітымнасць у вачах міжнароднай супольнасці. Практыка рэжыму вызваляць некаторых зняволеных, адначасова затрымліваючы новых прадстаўнікоў апазіцыі, журналістаў і праваабаронцаў, не павінна заставацца без кантролю. У той жа час Беларусь працягвае садзейнічаць незаконнай вайне Расіі супраць Украіны, у тым ліку забяспечваючы ўдары беспілотнікаў з яе тэрыторыі і падтрымліваючы гібрыдныя тактыкі, такія як арганізацыя нерэгулярнай міграцыі ў ЕС. Гэтыя дзеянні не толькі падтрымліваюць рэпрэсіі ўнутры краіны, але і наўпрост падрываюць інтарэсы ЗША і агульную трансатлантычную бяспеку ў рэгіёне», — лічаць амерыканскія заканадаўцы.

Яны адзначылі, што адміністрацыі Трампа неабходная пастаянная пільнасць «у далейшым узаемадзеянні з рэжымам Лукашэнкі».

«Любых вызваленых палітвязняў трэба цалкам вызваліць ад усіх выстаўленых абвінавачанняў. Іх не павінны прымушаць да выгнання, што з'яўляецца парушэннем міжнароднага права. Мы таксама заклікаем Дзярждэпартамент надаць прыярытэт забеспячэнню вызвалення тых, каму патрэбная тэрміновая медыцынская дапамога, згодна з так званым „гуманітарным спісам“, падрыхтаваным беларускімі праваабарончымі арганізацыямі», — напісалі заканадаўцы.

Яны заклікалі Дзярждэпартамент у любых будучых перамовах з уладамі Беларусі надаць прыярытэт вызваленню наступных палітвязняў: Марыі Калеснікавай, Віктара і Эдуарда Бабарыкаў, Марфы Рабковай, Алеся Бяляцкага, Валянціна Стэфановіча, Уладзіміра Лабковіча, Анастасіі Лойкі, Дзяніса Івашына, Максіма Знака і Кацярыны Андрэевай. Ліст сенатараў падтрымалі Інстытут Маккейна і Freedom House.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]