Сем няўдач беларускай улады

Мінулы год не стаў выключэннем.

Улады чарговы раз не выканалі шэраг абяцанняў, якія давалі грамадзянам Беларусі. "Салідарнасць" пералічвае частку з іх.

Выхад на серыйную вытворчасць беларускіх электрамабіляў

Даўні серыял са стварэннем айчыннага электракара атрымаў працяг у 2024-м ды яшчэ якп. У пачатку года Аляксандр Лукашэнка заявіўся на завод «БелДжы» і запатрабаваў выйсці на серыйную вытворчасць беларускіх электрамабіляў да 1 студзеня 2025 года.

Зрэшты, чыноўнікі ўжо звыклі да дзіўных і неабгрунтаваных задач дыктатара. Дырэктар «БелДжы» Генадзь Свідзерскі ў апошнім інтэрв'ю не стаў нават апраўдвацца за невыкананне задачы:

- Пяць даследчых узораў BELGEE eX50 ужо гатовыя… Гэта ўсё яшчэ даследчыя ўзоры, і мэта дадзенай доследна-прамысловай партыі - ацаніць тэхнічныя і камерцыйныя параметры аўтамабіля, а таксама яго канкурэнтаздольнасць.

Даволі празрыста намякнуў ён і пра перспектывы беларускага электракара:

- Адна справа - вырабляць мадэль, першапачаткова якая праектавалася як электрамабіль. Зусім іншая - у аўто з ДВС дадаць бензабак і ўстаўляць іншае абсталяванне. Гэта можа выклікаць рост сабекошту ў параўнанні з канкурэнтамі.

Запуск цягніка да менскага аэрапорта і «аднаўленне ўсіх дарог»

У 2020-м Лукашэнка заявіў: у Нацыянальны аэрапорт «Мінск» на працягу 2-3 першых гадоў наступнай пяцігодкі будзе падведзены цягнік са сталіцы. Абяцанне не выканана, чаму, зрэшты, варта парадавацца: эканамічнай мэтазгоднасці ў будаўніцтве чыгункі да аэрапорта не было ў мінулым, і тым больш няма зараз - пры забароне «Белавія» лётаць у Еўропу і малой пасажырскай плыні.

Наогул, даваць «транспартныя» абяцанні - адзін з улюбёных заняткаў дыктатара, які вядомы тым, што не адказвае за свае словы. Так у сакавіку 2024-га Лукашэнка заявіў, што ўжо да 9 траўня «ўсе дарогі павінныя быць адноўленыя».

З апошняга - перад Новым Годам ён заявіў аб планах звязаць гарады-спадарожнікі з Менскам хуткаснымі шляхамі. Але калі пятнаццаць гадоў таму ў яго выказваннях фігуравала проста чыгунка, то ў новай версіі старога абяцання - з'явілася «наземнае метро».

Скасаванне роўмінгу паміж Беларуссю і Расеяй

Дамоўленасць аб гэтым была ўкладзеная яшчэ ў 2018 годзе. Першапачаткова пастанова павінна была набыць моц у 2022-м. Затым і беларускія, і расейскія чыноўнікі не раз паўтаралі, што ў 2024-м роўмінг дакладна скасуюць.

І які раз гэтага не адбылося. Новае абяцанне - роўмінг з РФ скасуюць з 1 сакавіка 2025 года.

Пачатак рамонту ў Чырвоным касцёле

Храм у цэнтры Менска ўлады закрылі ў 2022-м, заявіўшы аб неабходнасці рамонту пасля пажару. У кастрычніку наступнага года намеснік старшыні Мінгарвыканкама Арцём Цуран заявіў, што рэканструкцыя касцёла св. Сымона і Алены ў Менску «вядзецца згодна з планам» і ў першым квартале 2024-га «павінны пачацца працы ў будынку».

Але гэтага не адбылося ні ў першым, ні ў другім, ні ў трэцім, ні ў чацвёртым квартале. Апошняя навіна - улады запатрабавалі ад прыходу касцёла выплаціць запазычанасць у памеры 148 тысяч рублёў.

Шырокае ўжыванне айчыннай вакцыны ад COVID-19

Некалькі гадоў таму Лукашэнка вызначыўся дзіўным патрабаваннем стварыць беларускую вакцыну ад кавіда. У пачатку 2023-га тагачасны міністр аховы здароўя Дзмітрый Піневіч заявіў: шырокае выкарыстанне айчыннай вакцыны ад COVID-19 плануецца пачаць у Беларусі ў 2024 годзе.

І вось на вуліцы ўжо 2025-ы, а беларускай вакцыны «БелКовідВак» у паліклініках як не было, так і няма. Увосень паведамлялася пра скаргі беларусаў на тое, што ўвогуле ніякай вакцыны няма, але затым падвезлі расейскую «Спутник Лайт».

Белыя халаты адзначалі: «Відавочна, што план на 2024 год цалкам няўдалы - вытворчасць беларускай вакцыны не пачалася».

Запуск беларускага спадарожніка

Мала хто ўжо памятае, але некалі ўлады заяўлялі, што неўзабаве Беларусь ператворыцца ў буйнога вытворцу спадарожнікаў. Перыядычна чыноўнікі давалі абяцанні аб канкрэтных тэрмінах запуску.

Напрыклад, у 2021-м кіраўнік Акадэміі навук Уладзімір Гусакоў заявіў аб супрацоўніцтве з расейцамі:

- Прадугледжана стварэнне групоўкі з двух касмічных апаратаў, запуск першага запланаваны пакуль на 2024 год.

Летась ўлады аб гэтым абяцанні не ўспаміналі.

Запуск Нежынскага горна-ўзбагачальнага камбіната

Амаль дзесяцігоддзе таму Лукашэнка і расейскіх алігарх Міхаіл Гуцэрыеў запэўнівалі: калі ў нашай краіне пачне працаваць другое прадпрыемства ў вытворчасці калійных угнаенняў, беларусы зажывуць значна лепш.

Толькі вось будаўніцтва ў Любанскім раёне ўсё ніяк не закончыцца. Скончыць яго мусілі ў 2023-м, але і ў 2024-м гэтага не адбылося. Больш за тое, высветлілася, што справы з Нежынскім ГАК ідуць даволі кепска.

Гуцэрыеў заявіў, што пасля ўвядзення санкцый ён «страціў цікавасць да гэтага праект» і перадаў яго «беларускай дзяржаве», станоўча адказаўшы на пытанне аб «фактычнай нацыяналізацыі».

Іншы «мегакіраўнік» Лукашэнкі адзначыўся ў 2024-м такімі словамі аб Няінскім ГАК: «Калі ласка, навядзіце парадак, наколькі магчыма гэта на будоўлі».

Паўтара гады таму чыноўнікі заяўлялі, што Нежынскі ГАК павінен пачаць працу да 1 чэрвеня 2025 года. Але ўжо відавочна, што і гэтае абяцанне будзе невыкананае.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]