Швэйцарцы адпрэчылі рэформу пенсійнай сістэмы

Таксама жыхары краіны не падтрымалі ініцыятыву ў абароне біяразнастайнасці.

Швэйцарцы не падтрымалі прапанаваную ўладамі частковую рэформу пенсійнай сістэмы. Паводле папярэдніх вынікаў, 69 адсоткаў удзельнікаў рэферэндуму, праведзенага ў нядзелю, 22 верасня, выказаліся супраць рэструктурызацыі так званага другога складніку пенсійнай сістэмы, закліканага фінансава стабілізаваць яе, паведамляе DW.

Правесці рэформу планавалася на фоне росту колькасці пенсіянераў, павелічэння даўжыні жыцця і зніжэння прыбыткаў. Другі складнік пенсійнай сістэмы ў Швэйцарыі ўключае ў сябе персанальны пенсійны ашчадны рахунак, унёскі на які робяць як супрацоўнікі, так і працадаўцы. Урад хацеў знізіць мінімальны адсотак ад назбіранай сумы, які павінен выплачвацца штогод, каб грошай на гэтым рахунку хапала на даўжэйшы тэрмін.

У сакавіку на рэферэндуме ў Швэйцарыі 58,2 адсотка грамадзянаў выказалася за дадатковыя выплаты пенсіянерам – так званую трынаццатую пенсію.

У Швэйцарыі не падтрымалі ініцыятыву ў абароне біяразнастайнасці

Таксама большасць удзельнікаў рэферэндуму выступілі супраць ініцыятывы ў захаванні біялагічнай разнастайнасці. Згодна з папярэднімі вынікамі галасавання, апублікаванымі на сайце федэральнай канцылярыі, супраць дадатковых прыродаахоўных захадаў выступілі амаль 65 адсоткаў прагаласавалых. Яўка склала блізу 45 адсоткаў.

Ініцыятыва меркавала, што федэральны ўрад і кантоны павінны ўзмацніць захады для абароны краявіднай разнастайнасці жывёлаў і раслінаў, прыроднага ландшафту і архітэктурнай спадчыны. Ахоўныя захады павінны былі ахапіць больш тэрыторыі і патрабавалі павелічэння фінансавання.

Каментуючы вынікі плебісцыту, Лукас Гольдэр з сацыялагічнага інстытута gfs.bern, адзначыў у эфіры швэйцарскага тэлеканала SRF, што ягоныя ўдзельнікі не думаюць, што праблема біяразнастайнасці надзённая.

Праціўнікі пашырэння захадаў у ахове прыроды аргументавалі сваю пазіцыю тым, што ініцыятыва прывяла б да сур'ёзнага абмежавання вытворчасці харчовых тавараў. Паводле іх падлікаў, практычна недатыкальнымі сталі б 30 адсоткаў земляў краіны, таксама пацярпела б і вытворчасць электраэнэргіі з выкарыстаннем аднаўляльных крыніцаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]