Беларусу, які абвясціў галадоўку праз захраслы ў Клайпедзе аўтамабіль, стала дрэнна

Яго забрала хуткая.

53-гадоваму беларусу Рыгору Алексіевічу, які абвясціў у Клайпедзе 8 верасня галадоўку, стала дрэнна і яго забрала хуткая дапамога. Пра гэта ён сам паведаміў «Новой газете. Балтия», даслаўшы відэа з хуткай.

- Пацямнела ў вачах, рэзка абмяклі рукі і ногі. Цяпер цяжка гаварыць, - удакладніў мужчына, які, паводле ягоных слоў, у гэты момант знаходзіўся на Клайпедскай тэрытарыяльнай мытні. - Лекары падазраюць сардэчны прыступ.

Медыкі, якія прыбылі на выклік, удакладнілі, што Рыгора Алексіевіча шпіталізуюць у Клайпедскую ўніверсітэцкую лякарню. Раней ён расказваў, што гатовы трымаць бестэрміновую галадоўку.

- Напэўна, нервы здаюць, - выказаў меркаванне беларус.

Напярэдадні падавалася, што ягоная галадоўка мела вынік.

Лагістычная кампанія, якая займаецца афармленнем мытных дакументаў, перадала аўтамабіль у порт Клайпеды, а беларусу выдалі транзітныя нумары.

- Я думаў, што ўсё атрымалася, але калі я прыйшоў у порт, мне назвалі ранейшыя аргументы, спаслаўшыся на санкцыйныя абмежаванні, - дадаў Рыгор.

Нагадаем, гібрыдны Honda CR-V (2020 г. ст.) Рыгор Алексіевіч здабыў на папулярным амерыканскім аўкцыёне Copart у красавіку 2024 года. Пакуль пазадарожнік знаходзіўся на шляху ў Літву, былі прыняты меры для ўзмацнення санкцый у дачыненні да грамадзян Беларусі. З 4 чэрвеня 2024 года, каб завезці некаторыя легкавікі (з рухавіком аб'ёмам больш за 1,9 літра), трэба падаць дадатковыя дакументы. У тым ліку дэкларацыю вытворцы транспартнага сродку аб тым, што аўтамабіль не будзе прададзены ў Расею. Зразумела, такой даведкі ў пакупнікоў няма - амерыканскія аўкцыёны іх не выдаюць.

У выніку, паводле неафіцыйных звестак, блізу 4 тысяч легкавікоў, набытых беларусамі, затрымаліся ў Клайпедзе. Уладальнікі гэтых аўтамабіляў сцвярджаюць, што пры абмеркаванні абмежаванняў была прадугледжаная агаворка: калі аўто былі набыты да 1 ліпеня, то іх выпускаць у абарачэнне можна. Але гэты аргумент не пераконвае літоўскія ўлады.

На мінулым тыдні беларус прыехаў у Клайпеду, каб на месцы разабрацца ў праблеме. Аднак вычарпаўшы магчымасці, абвясціў галадоўку.

Нягледзячы на тое, што зараз мужчына знаходзіцца ў шпіталі, ён працягвае галадоўку, адмаўляецца прымаць ежу і лекі. У размове з “Новай газетай. Балтия” ён згадаў, што, акрамя беларускага, ён мае грамадзянства ЗША. У медычнай установе яго прынялі як амерыканца і размаўляюць з ім па-ангельску.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]