«Такога не было ніколі»

Чаму адбываецца калапс на мяжы Беларусі і ЕЗ?

Як стала вядома сайту Charter97.org, у Нямеччыне спынілі аўтобус з турыстамі з Беларусі. Выявілася, у пашпартах у іх былі грэцскія шэнгенскія візы.

Турыстычны аўтобус накіроўваўся ў Гішпанію, што парушае правілы Шэнгена. Была прынятая пастанова ануляваць візы і адправіць іх у Беларусь.

- Паводле закона немцы маюць рацыю, бо гэта сапраўды нямэтавае выкарыстанне візы, - згаджаецца супрацоўнік беларускага турагенцтва (адмовіўся назваць сваё імя ў мэтах бяспекі - заўв.), каментуючы «Салідарнасці» інцыдэнт з беларускімі турыстамі. - Такую схему турыстам прапануюць нашы аператары і, трэба разумець, робяць яны гэта на свой страх і рызыку.

Але і іх зразумець можна, у іх проста няма іншага выйсця.

На Польшчу немагчыма запісацца, праграмісты (пасярэднікі) заломліваюць кошты кожны дзень. А асабіста ты наогул не зловіш ніяк гэтую чаргу, цябе ўвесь час выкідвае.

Чалавек, які не валодае кампутарам на ўзроўні, вышэйшым за проста добры, можа нават не пачынаць. Часы, калі кожны мог за нейкі час патыкаць пальчыкам і неяк злавіць чаргу, сышлі і забытыя.

Таму кожны тыдзень людзі, якія чакаюць магчымасці патрапіць на падачу дакументаў, па-новаму перапісваюцца і праходзяць верыфікацыю.

Па два-тры месяцы запісваюцца на працоўную візу. Пры гэтым сярэдні кошт за запіс на падачу працоўнай візы - прыкладна 500 р. Адмоў недзе 30%.

Па турыстычных польскіх візах адмоў менш, але візу адкрываюць на месяц у найлепшым выпадку. Пры гэтым сам запіс на турыстычную візу каштуе 700 рублёў. Плюс абавязковая аплата гатэля. Вось такі кошт пытання.

З Гішпаніяй таксама ўсё далёка не аптымістычна. Цэннік на запіс - у раёне 500 рублёў. Пад групы дадатковых квот не даюць. Разгляд дакументаў доўжыцца 45 дзён. І візы даюць толькі на месяц.

У грэкаў вельмі вялікі адсотак адмоў, неяк яшчэ можна паспрабаваць адкрыць пад арганізаваныя групы, але, калі яны і адкрываюць, то толькі аднаразовыя візы.

Балгары - таксама толькі аднаразовыя і з аплатай гатэля.

У італійскае пасольства запіс на 3-4 месяцы наперад, у асноўным толькі пад арганізаваныя групы. І там наогул хаос поўны: жывая чарга, сшытак, пераклічкі.

У нямецкае пасольства чаканне падачы паўгода-год. У французскае складана патрапіць наогул і стала вельмі шмат адмоў.

Гэта проста ненармальная сітуацыя. Такога не было ніколі. Калі мяне зараз турысты просяць «Адкрыйце мне візу», я сапраўды адказваю, што не ведаю, што вам прапанаваць. І я рэальна не ведаю.

- Вы згаджаецеся, што такога не было ніколі: і столькі складанасцяў з атрыманнем візы, і такіх вялізных чэргаў на мяжы.

- Так, чэргі зараз катастрафічныя. Я часта на сувязі са сваімі кліентамі. Яны ўсе расказваюць, як прыязджаюць на мяжу і іх аўтобус аказваецца саракавым ці пяцідзясятым, ці яшчэ нейкім.

Многія бегаюць па ўсёй чарзе, каб перасесці. Так і кажуць «пераселі на 35-45 аўтобусаў наперад, інакш стаялі б яшчэ дзень». І гэтыя аўтобусы, якія стаяць наперадзе, усе пустыя, бо яны таксама перасадзілі сваіх пасажыраў.

Такса «на падсадку» зараз мінімум 50 еўраў з чалавека. Транспартная інспекцыя ўстанавіла адзін раз забарону на гэтыя перасаджванні, але яна пратрымалася даслоўна тыдзень. Потым яны гэта спусцілі на тармазах.

І ўсё працягваецца. А якія яшчэ ёсць варыянты - жыць на мяжы суткамі?

- Як вы тлумачыце гэты калапс?

- Зразумела, што сезон адпачынкаў. Зразумелая і сітуацыя з легкавымі аўто на беларускіх нумарах, якія зараз могуць ехаць толькі праз Тэрэспаль.

Гэта значыць, пераход застаўся адзін, супрацоўнікаў там, магчыма, тая ж колькасць, і, трэба сказаць, палякі дастаткова хутка працуюць.

Мае кліенты кажуць, што агулам яны прапускаюць два аўтобусы за гадзіну. Але, канешне, калі ў чарзе сто аўтобусаў…

- Што, на ваш погляд, можа змяніць гэтую сітуацыю?

- Галоўная прычына, па-мойму, памяншэнне квот, якія амбасады выдаюць на запіс. Візавыя цэнтры стаяць пустыя, бо як ніколі раней урэзалі квоты.

Дапусцім, толькі на польскім кірунку ў кожнага агента (праграміста-пасярэдніка) у чарзе 350 чалавек на запіс, а месцаў на ўсю краіну выдаецца сто!

І ў астатніх пасольстваў сітуацыя не лепшая. Калі параўноўваць з папярэднімі гадамі, усе паменшылі квоты мінімум разы ў тры. Таму лагічна меркаваць: сітуацыю пры такім шалёным попыце можа выправіць толькі большая колькасць квот.

Але тут мы ўжо закранаем сферу палітыкі, на якую не можам уплываць. Чаму паменшылі квоты? Бо ў пасольствах зменшылася колькасць супрацоўнікаў.

А чаму іх стала менш, напрыклад, з васьмі польскіх консулаў засталося толькі два? Праз «умелую» палітыку нашага кіраўніцтва. Таму памяншэнне квот, магчыма, наогул тэхнічнае следства ў сувязі з сітуацыяй, якая склалася, а не чыйсьці капрыз.

Размотваючы гэты снежны ком, думаю, кожны зможа адказаць на пытанне, чаму так адбываецца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]