Пуцін заявіў Орбану, што яму не патрэбнае перамір'е ва Украіне
32- 5.07.2024, 21:20
- 20,252
![Пуцін заявіў Орбану, што яму не патрэбнае перамір'е ва Украіне](https://i.c97.org/ai/601720/aux-head-1720203513-20240101_skriin_360.jpg)
Расейскага дыктатара цікавіць «канчатковае заканчэнне канфлікту» на ягоных умовах.
Расейскі дыктатар Уладзімір Пуцін заявіў прэм'ер-міністру Вугоршчыны Віктару Орбану, што яго не цікавіць перамір'е ці часовае спыненне агню паміж украінскімі і расейскімі войскамі. Пра гэта ён сказаў падчас візіту Орбана ў Маскву 5 ліпеня.
«Гэта павінна быць не проста перамір'е ці часовае прыпыненне агню, ні нейкая паўза, якую кіеўскі рэжым мог бы выкарыстаць, каб аднавіць страты, перагрупавацца і даўзброіцца. Расея выступае за поўнае і канчатковае заканчэнне канфлікту», – заявіў Пуцін на прэс-канферэнцыі пасля перамоваў з Орбанам, паведаміла расейскае прапагандысцкае агенцтва «Інтэрфакс».
Пуцін нагадаў, што ў ягоным разуменні «поўнае і канчатковае заканчэнне канфлікту» павінна пачацца пасля таго, як Украіна выведзе свае ўзброеныя сілы з тэрыторыі Данецкай, Луганскай, Запарожскай і Херсонскай абласцей. Гэта значыць, ён паўтарыў свой ультыматум, з якім выступіў напярэдадні Саміту міру ў Швэйцарыі, але на гэты раз не ўспамінаў пра адмову ад NATO.
Пры гэтым Пуцін заявіў, што паслухаў Орбана і прыйшоў да высновы, што «ў Кіеве ўсё яшчэ не гатовыя адмовіцца ад ідэі вядзення вайны да пераможнага канца».