Сіноптыкі папярэдзілі беларусаў пра «лінію няўстойлівасці» паветраных мас
- 24.07.2024, 11:58
- 3,364
![Сіноптыкі папярэдзілі беларусаў пра «лінію няўстойлівасці» паветраных мас](https://i.c97.org/ai/348477/aux-head-1568562507-20190915_silnyj_veter_360.jpg)
Як яна паўплывае на надвор'е?
Сіноптыкі тэматычнага канала пра надвор'е Nadvorie далі прагноз на сераду, а Белгідрамет - на другую палову тыдня. Паводле звестак спецыялістаў, 24 ліпеня халодны фронт "працягне боўтацца" над захадам Беларусі, а пасля абеду "пачне абвастрацца". Іншымі словамі, жыхароў Гарадзеншчыны чакаюць "прыстойныя залевы" і навальніцы, піша telegraf.news.
Тым часам па ўсходзе краіны назіраецца «невыразная лінія няўстойлівасці», якая падобная да рэшткаў таго самага халоднага фронту. Можна спадзявацца, што тут неспадзяванак не будзе.
![](https://i.c97.org/ai/604053/aux-1721811540-photo_2024-07-24_09-39-44.jpg)
Таксама сіноптыкі канала Nadvorie звярнулі ўвагу, што на захадзе Беларусі ў сераду тэмпература будзе вагацца ў межах +21..+24°С. У цэнтры краіны, гэта значыць на Меншчыне, паветра прагрэецца крыху вышэй: +26..+28°С. А вось на ўсходзе паказчыкі будуць блізкія да заходніх: тут слупок тэрмометра пакажа +24..+26°С.
Што да прагнозу Белгідрамета, то ў наступныя два дні, 24-25 ліпеня, паводле звестак спецыялістаў, на надвор'е ў краіне прадоўжаць уплываць “цёплыя няўстойлівыя паветраныя масы”, а вось заходнія рэгіёны па-ранейшаму будуць знаходзіцца ва ўладзе халоднага фронту.
Так, у чацвер, 25 ліпеня, прагназуецца воблачнае з праясненнямі надвор'е. Месцамі ў краіне пройдуць кароткачасовыя дажджы, а ў Берасцейскай і Гарадзенскай абласцях магчымыя навальніцы. Акрамя таго, уночы і раніцай чакаецца слабы туман. Тэмпература паветра пасля заходу складзе +11..+18°С, а ўдзень слупок тэрмометра паднімецца да +22..+29°С. Па захадзе Беларусі ў гэты дзень прагназуецца +19..+21°С.
У пятніцу, 26 ліпеня, у краіне будзе пахмурна. На большай тэрыторыі Берасцейскай і Гарадзенскай абласцей чакаюцца кароткачасовыя дажджы, папярэдзілі сіноптыкі. У асобных раёнах прагрымяць навальніцы, а ноччу і раніцай беларусы могуць назіраць слабы туман. У цёмны час дня тэмпература паднімецца да адзнакі +12..+18°С, а днём слупок тэрмометра пакажа +23..+30°С.