У Індыі загарэўся і перакуліўся на бок фрэгат ВМС
9- 22.07.2024, 20:58
- 7,336
![У Індыі загарэўся і перакуліўся на бок фрэгат ВМС](https://i.c97.org/ai/603873/aux-head-1721671127-20240101_skriin_360.jpg)
Знік адзін чалец экіпажу.
На караблебудаўнічай верфі ў Мумбаі загарэўся і перакуліўся на бок фрэгат ваенна-марскіх сілаў «Брахмапутра». Ён праходзіў прафілактычны рамонт, паведамляе The Times of India.
Пажар пачаўся ўвечары ў нядзелю, 21 ліпеня і, як паведамляецца, быў лакалізаваны да раніцы панядзелка. Паведамляецца пра знікненне без вестак малодшага матроса, які служыў на караблі. Прызначаная камісія ў расследаванні інцыдэнту і пошуку зніклага. Карабель атрымаў цяжкія пашкоджанні.
«Брахмапутра» – галаўны фрэгат аднайменнага праекту, карабель быў прыняты ў склад флоту ў 2000-м годзе. Ягонае водазмяшчэнне 5300 тонаў, ён узброены тарпеднымі апаратамі, крылатымі і зенітнымі ракетамі і зброяй СПА.
Hindustan Times адзначае, што з 2010 года на індыйскім флоце зафіксавана не менш як 20 выпадкаў загаранняў і пажараў, у тым ліку з чалавечымі ахвярамі. З 2000 года ВМС страцілі ў мірны час тры караблі.