Памёр мастак Валер Чайка, які афармляў менскае метро
1- 15.07.2024, 19:39
- 4,376
![Памёр мастак Валер Чайка, які афармляў менскае метро](https://i.c97.org/ai/602973/aux-head-1721061562-20240101_czajaka_120.jpg)
Яму было 73 гады.
Вядомы мастак-манументаліст Валерый Чайка памёр ва ўзросце 73 гадоў. Пра гэта паведаміў Беларускі саюз мастакоў на сваёй старонцы ў Facebook.
Прычына смерці не называецца, вядома толькі, што мастак памёр раптоўна. Аб даце развітання з ім будзе абвешчана пазней.
Валерый Паўлавіч Чайка распачаў сваю творчую дзейнасць у 1976 годзе. Ён таксама быў чальцом Беларускага саюза мастакоў і актыўна ўдзельнічаў у жыцці арганізацыі.
Яму належыць комплекснае афармленне інтэр'ераў многіх аб'ектаў у Беларусі: станцыі менскага метрапалітэна «Інстытут культуры», рэстарацый «Беларусь» і «Гасціны двор» у Менску, аэрапорта Мінск-2, аб'ёмных кампазіцый са шкла і металу ў Палацы Рэспублікі і іншых.
Чайка - аўтар вітражоў літага шкла для станцыі менскага метро «Інстытут культуры», кавярні «Грунвальд» у Менску, аб'ёмна-прасторавых кампазіцый у музеі нафтавікоў у Рэчыцы і іншых. Ён таксама аўтар класічнага вітража «Крыж» з роспісам абразоў па шкле ў менскім Свята-Духавым кафедральным саборы.
Мастак стаў лаўрэатам Дзяржаўнай прэміі мастацтва і архітэктуры (2004) за комплекснае мастацкае вырашэнне інтэр'ераў Палаца Рэспублікі. Таксама ён атрымаў прэмію «За духоўнае адраджэнне» (2011), удзельнічаў у шматлікіх рэспубліканскіх, усесаюзных і міжнародных мастацкіх выставах.