Топ-7 новых правілаў аплаты бальнічнага, якія датычацца кожнага беларуса
1- 1.07.2024, 11:49
- 5,780
Разлік вядзе ФСАН.
Беларусаў, якія працуюць, з 1 ліпеня чакае новая сістэма разліку і аплаты дапамогі па часовай непрацаздольнасці і па цяжарнасці і родах, або лісткоў непрацаздольнасці. Вось як аплата бальнічнага ў Беларусі паводле новых правілаў закране кожнага.
Першае правіла – тыя, хто даўжэй плаціць унёскі ў ФСАН, і па бальнічным атрымае больш. Гэта азначае, што тым работнікам, якія працуюць больш за 10 гадоў і акуратна выплачваюць узносы ў Фонд сацыяльнай абароны насельніцтва Мінпрацы і сацабароны Беларусі, з першага і да апошняга дня бальнічнага налічаць 100 працэнтаў сярэднядзённай зарплаты. Тыя ж, хто працуе пакуль менш за 10 гадоў, атрымаюць 80%. Як і да 1 ліпеня, 100% страчанага заробку атрымаюць бацькі, якія ідуць на бальнічны з дзіцем, жанчыны па цяжарнасці і родах.
Другое правіла – тыя, у каго невялікі заробак, па бальнічным будуць атрымліваць прыкладна ўтрая больш, чым да 1 ліпеня. А ўсё таму, што мінімальны памер бальнічных адвязалі ад бюджэту пражытачнага мінімуму (складаў 50%), і прывязалі да мінімальнага заробку.
Так, напрыклад, у чэрвені 2024 палова бюджэту пражытачнага мінімуму гэта 209,36 рубля, а мінімальны заробак – 626 рублёў. Розніца ў 2,9 разы.
Трэцяе правіла – з 1 ліпеня павялічыцца ўтрая, з 6 месяцаў да паўтара года, заробак, які ўлічваецца пры налічэнні бальнічнага. Тым часам можа ўвайсці і заробак на працы, з якой, напрыклад, чалавек ужо паспеў звольніцца, калі, вядома, усюды акуратна пералічваліся ўнёскі ў ФСАН.
У гэтыя 1,5 года не ўвойдуць перыяды прастою і адпачынку за свой кошт на ініцыятыву наймальніка, перыяды часовай непрацаздольнасці і час атрымання іншых сацыяльных выплат, падкрэслілі ў Мінпрацы.
Чацвёртае правіла – з 1 ліпеня павялічыцца сума сярэднядзённага заробку, які прымяняецца для разліку бальнічных. Гэта азначае, што бальнічны будуць налічваць не толькі з заробку, як было да гэтага, а яшчэ і з улікам іншых выплат, такіх, напрыклад, як матдапамога, дапамога на аздараўленне да адпачынку або іншых разавых выплат.
Пятае правіла датычыцца сумяшчальнікаў, ім з 1 ліпеня бальнічныя будуць прызначацца толькі па асноўным месцы працы, але з улікам заробку ва ўсіх працадаўцаў. Але для іх ёсць адно «але», калі, будучы на бальнічным, чалавек па асноўным месцы працу не працаваў, але меў сілы працаваць па сумяшчальніцтве, то ў гэтым выпадку бальнічны яму не выплацяць, бо ён меў заробак, хоць і не вельмі вялікі.
Па месцы працы па сумяшчальніцтве бальнічныя будуць прызначацца толькі пры адсутнасці асноўнага месца працы. Пры гэтым прызначэнне будзе рабіцца толькі па адным з месцаў працы па сумяшчальніцтве па выбары самога работніка, удакладнілі ў Мінпрацы і сацабароне.
Шостае правіла датычыцца работнікаў, якія працуюць па грамадзянска-прававых дамовах, або дамовах падраду. Напрыклад, чалавек мае асноўнае месца працы і падпрацоўку па дамове падраду. У выпадку бальнічнага ў яго будзе два разлікі. Адну дапамогу прызначаць па працоўнай дамове, другую – па дамове падраду.
Сёмае правіла датычыцца непасрэдна сум, якія будуць налічаны работніку, які пайшоў на бальнічны. Калі раней гэтыя сумы вылічвала бухгалтэрыя прадпрыемства або фірмы, то з 1 ліпеня гэтыя звесткі бухгалтарскай службе работадаўцы праз карпаратыўны партал будзе прадастаўляць Фонд сацабароны з улікам звестак персаніфікаванага ўліку, адзначылі ў Мінпрацы. Гэта нібыта павінна выключыць памылкі, якія дагэтуль сустракаліся пры налічэнні бальнічных.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
