Кошт зямлі вырас у Менску

Паднімуць і падатак.

Кадастравы кошт зямлі павысілі ў Менску. Гарадскія ўлады зацвердзілі вынікі новай адзнакі тэрыторый у зоне жылой шматкватэрнай забудовы.

Дакумент апублікаваны на Нацыянальным прававым інтэрнэт-партале.

Так, кошт зямлі вырас у розных раёнах па-рознаму. Месцамі павышэнне нязначнае – блізу 1,5%, але ёсць лакацыі, дзе прырост дасягнуў 5,5% і 11,5%.

Калі пераводзіць у валюту, то сярэдні кадастравы кошт зямлі ў Менску складае ад $200 да $300 за м2. А самая дарагая зямля ацэньваецца ў $417.

Вырасце падатак на зямлю

Паколькі падатак на зямлю ў Беларусі прывязаны да кадастравага кошту, то гэта азначае павышэнне памераў гэтага збору як для звычайных грамадзян, так і для юрыдычных асоб.

Адзначым, што для фізічных асоб зямельны падатак налічваюць па кожным участку. Пры гэтым стаўкі такога збору дыферэнцыраваны ў залежнасці ад тыпу функцыянальнага выкарыстання тэрыторыі.

Як вызначаюць кадастравы кошт?

Кадастравы кошт вызначаецца на аснове некалькіх фактараў: месцазнаходжанне ўчастка, яго памер, прызначэнне, а таксама інфраструктура. Ацэнку праводзяць спецыялізаваныя органы.

Пры гэтым кадастравы кошт часта адрозніваецца ад рынкавага. Першы ўстанаўліваецца зыходзячы з крытэрыяў і фіксуецца на пэўны перыяд. У той час як другі фармуецца на аснове попыту і прапановы на рынку.

Летась у сярэднім па краіне кадастравы кошт зямельных участкаў вырас на 7,5%.