Момант удару па пункце кіравання войскаў РФ пад Белгарадам трапіў на відэа

Дзве ракеты ляглі сапраўды ў цэль.

З'явілася відэапацвярджэнне знішчэння ў Белгарадскай вобласці пункта кіравання мотастралковым палком УС РФ. Кадры ўдару ўдзень 23 чэрвеня апублікавалі ўкраінскія рэсурсы, паведамляе Дыялог.UA.

Мяркуючы па відэа, якое было знятае дронам-выведнікам, аперацыя ажыццёўленая ў светлы час дня. У кадры патрапіў прылёт амаль адначасова дзвюх ракет па пункце УС РФ.

Якія менавіта сродкі паразы выкарыстоўвалі УСУ падчас удару, не паведамляецца. Вядома толькі тое, што ў аперацыі была задзейнічаная вайсковая авіяцыя Украіны.

Штаб УС РФ размяшчаўся ў сяле Нехацееўцы ў Белгарадскай вобласці РФ усяго ў некалькіх км ад украінскіх меж. Ён быў недалёка ад кірунку Харкаўскага фронту, дзе расейскае войска надыходзіць у бок Ліпцаў.

Раніцай 23 чэрвеня аб паспяховай атацы пункта кіравання мотастралковага палка РФ на Белгарадчыне даў справаздачу Генштаб Узброеных сіл Украіны. Страты расейскага войска падчас гэтай аперацыі ўдакладняюцца.