У якіх рэгіёнах Беларусі Пазняк перамог Лукашэнку на выбарах-1994?

Іх дастаткова шмат.

У 1994 годзе Зянон Пазьняк змагаўся за пасаду першага прэзідэнта Беларусі. Тыя выбары - знаходка для аматараў электаральнай геаграфіі, піша nashaniva.com.

Проста ацаніце ўзровень барацьбы ў Савецкім раёне Менска - за Шушкевіча тут прагаласавалі 23,4% выбарцаў, за Лукашэнку - 21,6%, за Пазняка - 21%, за Кебіча - 20,7%!

Такім чынам, у якіх рэгіёнах Зянон Пазняк быў пераможцам выбараў?

Гэта восем адміністрацыйных адзінак.

1) Іўеўскі раён - радзіма Зянона Пазняка. Тут за земляка прагаласавалі 40% выбарцаў!

2-3) Смаргонь і Смаргонскі раён. У той час гарвыканкам і райвыканкам існавалі асобна, таму вынікі галасавання падзеленыя. У Смаргоні за Пазняка было 38% (а ў Лукашэнкі толькі трэцяе месца), а ў суседніх вёсках - 34%.

4) Маладзечна - першы вялікі горад за Зянона, тут ён набраў 32,3%. Дарэчы, менавіта ў Маладзечне зафіксавалі анамальна вялікую колькасць галасоў «супраць усіх» - больш за 15%. Магчыма, гэта быў пратэст супраць таго, што мясцовы мэр Генадзь Карпенка так і не патрапіў у спіс кандыдатаў у прэзідэнты. У навакольных вёсках у Пазняка таксама нямала - 26,9%, але для перамогі гэтага не выстарчыла.

5) Ліда - тут сітуацыя падобная. За Пазняка прагаласавалі 31,8%, Лукашэнка адстаў ад яго. У лідскіх вёсках Зянон набраў 29,8%, але гэтага не выстарчыла для перамогі.

6) Вілейка - барацьба была гарачай. У Пазняка 31,6%, у Лукашэнкі 31,3%. Калі перавесці ў рэальныя лічбы, то розніца склала ўсяго 50 галасоў.

7) Астравецкі раён. На месцы будучага будаўніцтва АЭС Лукашэнка стаў толькі чацвёртым (15%). Ён прапусціў наперад і Дубко (18%), і Кебіча (21%), і Пазняка (27%).

8) Браслаўскі раён. На паўночным захадзе Беларусі Пазняку выстарчыла для перамогі 26%. Розніца з Лукашэнкам - 0,3% або прыблізна тыя самыя 50 галасоў.

Пералічаныя яшчэ некалькі раёнаў, дзе за Пазняка прагаласавала сапраўды шмат выбарцаў, хаця гэтага і не выстарчыла для перамогі. Гэта Столінскі раён (31,8%), Глыбоцкі раён (27,9%), Ваўкавыск (27,6%) і Мядзельскі раён (26,9%).

Што да буйных гарадоў, то ў Салігорску ў Пазняка было 24%, у Менску - 20,9%, у Жодзіне - 19,1%, у Гародні - 17%.

У выніку Пазняк заняў трэцяе месца з 12,8% галасоў. Ён уступіў Вячаславу Кебічу (17,33%) і Аляксандру Лукашэнку (44,82%), якія і трапілі ў другі тур.