«Тут марыў жыць кожны завадчанін»

Што прадаецца ў параднай браме пасёлка Аўтазавода?

Калісьці гэтыя мясціны былі прыгарадам Менска, аддзеленым ад сталіцы густым зялёным лесам (зараз ад яго застаўся парк 50-годдзя Кастрычніка). Цяпер жа Партызанскі праспект - гэта адно з самых ажыўленых месцаў горада. Менавіта тут пасля вайны з'явілася мястэчка для працаўнікоў Аўтазавода. Працоўнае мястэчка спраектавалі паводле найлепшых канонаў горадабудаўніцтва - малапавярховыя дамы, зялёныя двары, аб'екты сацкульбыту і вядома, парадныя ўязныя вежы з гадзіннікам. Сёння мы паглядзім, што прадаецца ў гэтых дамах, піша realt.by.

Жылы пасёлак для работнікаў МАЗа і іх сем'яў будаваўся адначасова з заводам - адразу пасля вайны. Першыя дзесяцігоддзі мястэчка было фактычна адарванае ад сталіцы і аддзеленае ад яго густым лесам. Але Менск даволі хутка рос і пашыраўся. У 70-я гады сюды ўжо пусцілі трамвай, а ў 80-я ў сувязі з бурнай забудовай Ангарскай і Шабаноў - Партызанскі праспект стаў асноўнай транспартнай артэрыяй раёна.

Парадны фасад пасёлка, у тым ліку ў раёне дзвюх раённых плошчаў (цэнтральнай і Палаца культуры), сфармаваны будынкамі павышанай паверхавасці, выкананымі паводле індывідуальных праектаў народнага архітэктара СССР Георгія Заборскага.

Вуліца Цэнтральная, якая стартуе з галоўнай плошчы, упрыгожаная двума вуглавымі дамамі з вежамі. На першых паверхах тут размясцілі гандлёвыя ўстановы і ўстановы сацкульбыту. У свой час, да адкрыцця ўнівермага «Беларусь», менавіта сюды на закупы ездзіў увесь раён.

Процілеглы бок плошчы заняў завадскі парк і яшчэ адзін жылы дом з высокай вежай з гадзіннікам.

Цяпер у дамах-вежах, пабудаваных у сталінскі перыяд, прадаюцца тры кватэры.

Адзін з самых недарагіх варыянтаў - двухпакаёвая кватэра ў доме побач з уваходам на станцыю метро «Аўтазаводская». У гэтай сталінцы на другім паверсе - 53 квадратныя метры, высокія столі, тоўстыя цагляныя сцены і выдатная шумаізаляцыя. Пакоі ў кватэры - паасобныя. У калідоры зручная ніша, ёсць вялікая шафа-купэ. Тры гады таму ў доме прайшоў капрамонт (замененыя трубы, газ, лічыльнікі). У двухпакаёўцы - не новы, але прыдатны для жыцця рамонт. Кошт - 67,9 тысячы даляраў (1272 даляры - за метр).

У вежцы насупраць прадаецца яшчэ адна двухпакаёвая кватэра. Яна знаходзіцца на трэцім паверсе. Плошча гэтай двухпакаёўкі складае 63 квадратныя метры. У кватэры з добрым рамонтам зробленая і зацверджаная перапланіроўка. Цяпер двухпакаёўка складаецца з прасторнай кухні-гасцёўні і асобнага пакоя. Мяркуючы па фатаграфіях, раней тут размяшчаўся офіс. Кошт - 83 тысячы даляраў (1317 даляраў - за метр).

Таксама тут прадаецца трохпакаёвая кватэра на першым паверсе. Як паказана ў аб'яве, гэтая сталінка з высокімі столямі ідэальна падыдзе для вываду ў нежылы фонд. Агульная плошча трохпакаёўкі складае 76 квадратных метраў. У кватэры зроблены касметычны рамонт, праведзеная замена водаправодных труб, ёсць лічыльнікі вады. У крокавай даступнасці - метро «Аўтазаводская». Кошт - 94,9 тысячы даляраў (1245 даляраў - за метр).