Нацбанк папярэджваў пра магчымую дэвальвацыю і запуск «друкарскага станка»: З'явіліся сімптомы

Луканоміку заліваюць «лішнімі» грашыма.

Памер грошай гатоўкай у звароце ў беларускай эканоміцы прадаўжае расці. На пачатак чэрвеня ён склаў 10 млрд 338,7 рубля, паведамляе Нацбанк. Раней рэгулятар папярэджваў пра дэвальвацыйную і інфляцыйную рызыкі, піша «Люстэрка».

Агульны памер грошай гатоўкай у звароце за травень павялічыўся на 172,2 млн рублёў – да 10 млрд 338,7 млн рублёў. Нагадаем, у красавіку, сакавіку і лютым гэты паказнік таксама вырас, а ў студзені – скараціўся. За 2023 год агульны памер такіх сродкаў у звароце вырас на 2 млрд 581 млн рублёў.

З пачатку гэтага года гэты паказнік павялічыўся на 864,1 млн рублёў.

Шырокая грашовая маса за травень дадала на 1 млрд 443,5 млн рублёў. На 1 чэрвеня гэты паказнік склаў 78 млрд 250 млн рублёў. Размова пра сродкі насельніцтва і прадпрыемстваў на рахунках у банках, а таксама грошы гатоўкай у абарачэнні. Гэта таксама рэкордна высокі паказнік.

З пачатку гэтага года шырокая грашовая маса павялічылася на 2 млрд 581,5 млн рублёў.

Якія пагрозы бачыць Нацбанк праз прыток грошай гатоўкай

Першы намеснік старшыні кіравання Нацбанка Сяргей Калечыц у студзені расказаў пра рызыкі, якія існуюць для збалансаванасці эканомікі ў 2024 годзе. Асноўная з іх – рост грашовай прапановы на рынку, у першую чаргу – праз павышаны попыт насельніцтва і бізнэсу на крэдыты.

«За 2023 год прырост сярэдняй шырокай грашовай масы склаў 28,1%, у тым ліку прырост сярэдняй рублёвай грашовай масы – 35,4%, – адзначаў Сяргей Калечыц. – Фактычная дынаміка паказнікаў грашовай прапановы істотна апярэдзіла прырост ключавых макраэканамічных паказнікаў у рэальным выразе. Захаванне цягам доўгага часу падобнага адхілення, як паказвае практыка, неўнікнёна прыводзіць да назапашвання макраэканамічных дысбалансаў».

Прадстаўнік Нацбанка растлумачыў, якімі праблемамі пагражае такая сітуацыя: «У будучыні яны могуць праявіцца праз узмацненне ціску на валютны рынак і курс беларускага рубля, павышаны попыт на спажывецкім рынку, раскручванне інфляцыйна-дэвальвацыйнай спіралі, пагаршэнне паказнікаў устойлівасці банкаўскага сектара».

Раней Нацбанк дапусціў, што ў 2024 годзе давядзецца ўключаць друкарскі станок і «заліваць» эканоміку грашыма, каб падтрымаць рубель.