Затрыманы першы намеснік старшыні Берасцейскага аблвыканкама

За хабары на тысячы даляраў.

Паводле падазрэння ў карупцыі затрымалі першага намесніка старшыні Берасцейскага аблвыканкама Валянціна Зайчука. Інфармацыя пра гэта ў незалежных СМІ з’явілася яшчэ ў лютым. 14 чэрвеня на нарадзе з Саветам Міністраў яе пацвердзіў Лукашэнка, зазначае «Зеркало».

Следства па чыноўніку ідзе ўжо паўгода. Паводле слоў Лукашэнкі, Зайчуку інкрымінуецца «атрыманне ўзнагароды ў якасці хабару на тысячы даляраў за спрыяльнае развязанне пытанняў, якія ўваходзілі ў яго кампетэнцыю».

Нагадаем, незалежныя СМІ аб затрыманні Зайчука паведамілі яшчэ 21 лютага. Крэсла першага намесніка старшыні Берасцейскага аблвыканкама Валянцін Зайчук заняў 18 чэрвеня 2021 года. Гэта яго прызначэнне (як і папярэднія) узгадніў Аляксандр Лукашэнка.

Зайчук курыраваў пытанні аграпрамысловага комплексу і перапрацоўкі сельскагаспадарчай прадукцыі.