Удар ATACMS па Крыме: страты расейцаў значна ўзраслі

Новыя падрабязнасці атакі на авіябазу «Бельбек» мыс Фіялент.

На акупаваным паўвостраве ракетамі ATACMS знішчаныя 2 пускавыя ўстаноўкі С-400 і радыёлакацыйная станцыя. Яшчэ адна РЛС, паводле звестак медыя, была пашкоджаная.

Уначы ў сераду, 12 чэрвеня, анэксаваны Расеяй Крым быў атакаваны адразу 12 ракетамі ATACMS, 7 з якіх нібыта былі збітыя, аднак астатнія 5 усё адно знайшлі свае цэлі. Аб гэтым піша расейскае медыя ASTRA са спасылкай на крыніцы ў экстранных службах.

Паведамляецца, што ля аэрадрома «Бельбек» у Севастопалі былі цалкам знішчаныя 2 пускавыя ўстаноўкі ЗРК С-400 і радыёлакацыйная станцыя.

Ля мыса Фіялент пашкоджаная яшчэ адна радыёлакацыйная станцыя. У навакольным лесе ўзнік пажар, а пацярпелых нібыта няма.

У той жа час іншы расейскі Telegram-канал піша, што ў ноч на 12 чэрвеня ў выніку ракетнага ўдару ў розных раёнах Крыма загінулі 23 вайскоўцаў. Больш за 30 атрымалі раненні. Паведамляецца, што частку параненых адвезлі ў Краснадарскі край і Растоў-на-Доне, бо шпіталі і лякарні Крыма і Севастопаля перапоўненыя параненымі на вайне.