Мабілізаваныя ўкраінскія зняволеныя ўзялі ў палон першага расейца

У Мінюсце Украіны расказалі падрабязнасці.

Першыя асуджаныя, якія праявілі жаданне далучыцца да Узброеных сіл Украіны, праходзяць зладжванне. Больш за тое, некаторыя з іх ужо ўдзельнічаюць у баявых аддзяленнях і нават узялі ў палон расейскага акупанта.

На сённяшні дзень да ўкраінскага войска далучыліся ўжо больш за 600 зняволеных. Пра гэта ў інтэрв'ю hromadske распавяла намесніца міністра юстыцыі Алена Высоцкая.

Паводле ейных слоў, эфектыўнасць мабілізацыі асуджаных ужо заўважная на пэўных рэчах. Таксама яна дадала, што колькасць зняволеных, далучаных да УСУ, увесь час расце. На 29 траўня асуджаных, якія выказалі жаданне мабілізавацца, было ўжо больш за 4 тысячы.

Высоцкая патлумачыла, што заявы асуджаных павінныя разглядацца ў судзе. Аднак перад гэтым зняволеныя-добраахвотнікі праходзяць праверку, вайскова-лекарскую камісію і знаёмства з камандзірамі.

«Асуджаныя, якія ідуць служыць зараз, робяць гэта абсалютна кантралявана пасля праверкі, паводле закону. Яны будуць рыхтавацца і выконваць важную для нашай дзяржавы работу. Працы на фронце шмат, не абавязкова са зброяй. Але нават калі са зброяй, у мяне ўжо ёсць паспяховы кейс: паступіла інфармацыя, што адны з першых асуджаных узялі ў палон расейца», - адзначыла Высоцкая.

Месца, дзе будуць служыць асуджаныя, вызначае Міністэрства абароны. У той жа час Высоцкая падкрэсліла, што зняволеным не даюць магчымасці служыць у тылавых падраздзяленнях, замяніўшы пакаранне фактычна на свабоду.

«Гэта таксама важна разумець, што пэўны час гэтыя людзі павінны працаваць на дзяржаву, а кантракт укладаецца да канца ваеннага становішча», - расказала Высоцкая.