Паліцыя правяла ператрусы ў офісах Еўрапарламента ў Брусэлі і Страсбургу
6- 29.05.2024, 17:35
- 7,100
![Паліцыя правяла ператрусы ў офісах Еўрапарламента ў Брусэлі і Страсбургу](https://i.c97.org/ai/307900/aux-main-1538746249-20181005_european_parliament_360.jpg)
Еўрачыноўніка падазраюць у працы на РФ.
У сераду, 29 траўня, брусэльская і французская паліцыя правялі серыю адначасовых ператрусаў у офісах Еўрапарламента ў Брусэлі і Страсбургу, а таксама ў доме супрацоўніка ЕП Гіёма Прадуры.
Пра гэта паведамляе Euronews са спасылкай на дэпутата Еўрапарламента Марсэля дэ Граафа. Ён пацвердзіў, што ператрусы праводзілі ў ягонага памагатага, але адмежаваўся ад абвінавачанняў.
«Я не маю ніякага дачынення ні да адной так званай расейскай дэзінфармацыйнай аперацыі. У мяне ёсць уласныя палітычныя перакананні, і я іх абвяшчаю. Гэта мая праца як дэпутата Еўрапарламента», - заявіў дэ Грааф.
Прадура быў выключаны з партыі Марын Ле Пэн "Нацыянальнае аб'яднанне" ў 2019 годзе за антысеміцкую пазіцыю, а раней працаваў памочнікам нямецкага дэпутата Еўрапарламента Максіміліяна Кра, які таксама фігуруе ў расследаванні аб кітайскім шпіянажы.
Адзначаецца, што ператрусы з'яўляюцца часткай шырокамаштабнага расследавання аперацыі расейскага ўплыву, у якой падазраецца, што Расея плаціла дзейным сябрам Еўрапарламента за распаўсюджванне пракрамлёўскай прапаганды ў Брусэлі.
Бэльгійскі пракурор, які санкцыянаваў ператрусы, заявіў, што ёсць «прыкметы» таго, што супрацоўнік парламента адыгрываў «значную ролю» ў расейскай прапагандысцкай аперацыі, пацвердзіўшы, што ператрус звязаны са справай аб «умяшанні, пасіўнай карупцыі і сяброўстве ў злачыннай арганізацыі».
У адказ на запыт Euronews аб афіцыйнай заяве прэс-служба Еўрапарламента паведаміла, што можа каментаваць бягучыя расследаванні.
Ператрус з'яўляецца апошнім этапам у расследаванні ў дачыненні да зарэгістраванай у Нідэрландах інфармацыйнай кампаніі Voice of Europe, на якую Еўрапейскі Звяз наклаў санкцыі ў пачатку гэтага месяца за распаўсюджванне крамлёўскай прапаганды.
Тэлекампанія сцвярджала, што падае «непадцэнзурныя навіны з Еўропы і свету», і нядаўна, у сакавіку гэтага года, правяла інтэрв'ю і дэбаты з дзейнымі чальцамі Еўрапарламента, якія трансляваліся з Еўрапейскага парламента ў Брусэлі і Страсбургу.
Адным з дэпутатаў Еўрапарламента, у якога так званыя СМІ ўзялі інтэрв'ю, быў Андэрс Вісцісэн, які прадстаўляў ультраправую фракцыю Еўрапарламента — Ідэнтычнасць і дэмакратыя (ID)
- у дэбатах напярэдадні чэрвеньскіх еўрапейскіх выбараў.
На пытанне Euronews у пачатку гэтага месяца, ці плацілі яму за гэта інтэрв'ю, Вісцісен рашуча запярэчыў.
«Не, вядома, не. Тое інтэрв'ю было арганізавана ў тым жа памяшканні, што і гэта. Мяне папрасілі даць інтэрвію, і я пагадзіўся. Гэта мая праца як палітыка», - сказаў ён.