Для беларусаў падрыхтавалі чарговую фінансавую пастку
9- 29.05.2024, 12:35
- 25,526
![Для беларусаў падрыхтавалі чарговую фінансавую пастку](https://i.c97.org/p/articles/2015/ai-148142-aux-head-20150418_ludi_minsk_new_360_t.jpg)
Пад пагрозу патрапілі сем'і з дзецьмі і пенсіянеры.
У Беларусі з 1 ліпеня пачне працаваць змена ў выплаце пенсій і дапамог на дзяцей - улады пашыраць спіс тых, хто будзе атрымліваць іх толькі праз банкі. Для гэтага трэба адкрыць спецыяльныя базавыя рахункі. У Мінпрацы 29 траўня на прэс-канферэнцыі заявілі, што тым, хто не абзавядзецца імі да 10 чэрвеня, перастануць выплачваць пенсіі і дапамогі. Альтэрнатыўнага варыянту, як атрымаць гэтыя грошы без адкрыцця рахунку ў банку, няма, піша zerkalo.io.
Якую змену ўвядуць
З 1 ліпеня многіх беларусаў перавядуць на атрыманне пенсій і дапамог на дзяцей праз банкі. Гэта закранае жыхароў Менска, а таксама гарадоў абласнога падпарадкавання і райцэнтраў. Выбраць фінустанову, праз якую атрымліваць гэтыя сродкі, можна самастойна. Нагадаем, зараз беларусы на свой выбар могуць атрымліваць пенсіі і дапамогі на дзяцей праз пошту ці банкі. Па-ранейшаму атрымліваць пенсіі праз пошту змогуць беларусы, старэйшыя за 70 гадоў, інваліды І і ІІ групы, а таксама жыхары сельскай мясцовасці.
Што датычыцца дапамог на дзяцей, то магчымасць атрымліваць іх праз пошту пакінулі за інвалідамі І і ІІ групы, а таксама за сем'ямі, якія выхоўваюць дзіця-інваліда ва ўзросце да 18 гадоў. Жыхары сельскай мясцовасці таксама па-ранейшаму змогуць атрымліваць дапамогу на дзяцей праз пошту.
Каб з ліпеня атрымліваць пенсію або дапамогі ў банку, трэба да 10 чэрвеня адкрыць базавы рахунак у адной з фінустаноў. Гэта могуць быць «Белаграпрамбанк», «Беларусбанк», «Банк БелЗЭБ», «Белгазпрамбанк», «Белінвестбанк», «Банк Дабрабыт», «Прыёрбанк» або «Сбер Банк». Пры гэтым можна выбраць атрыманне гатоўкі ў касе банка або па банкаўскай картцы.
Што гавораць у Мінпрацы
- Грамадзянам неабходна (да 10 чэрвеня. - Заўвага. рэд.) звярнуцца ў банкі і адкрыць базавыя рахункі, каб была бесперапынная пенсія, - заявіла падчас прэс-канферэнцыі 29 траўня начальніца галоўнай пенсійнай управы Мінпрацы Алена Гомарава. - Рэкамендуем звярнуцца ў банкі для бесперапыннага атрымання пенсій (наконт дапамогі на дзяцей такая ж сітуацыя. - Заўвага. рэд.).
Падчас прэс-канферэнцыі падсумавалі - тым, хто гэтага не зробіць, не будуць выплачваць пенсіі і дапамогі на дзяцей датуль, пакуль яны ўсё ж не адкрыюць базавыя рахункі. Альтэрнатыўнага варыянту, як атрымаць гэтыя сродкі, няма.