У Сеуле дамовіліся пра бяз'ядзерны Карэйскі паўвостраў
5- 27.05.2024, 21:14
- 6,480
![У Сеуле дамовіліся пра бяз'ядзерны Карэйскі паўвостраў](https://i.c97.org/ai/596684/aux-head-1716833655-20240101_mask_360.jpg)
Удзельнікі саміту Паўднёвай Карэі, Кітая і Японіі падпісалі супольную дэкларацыю пра дэнуклеарызацыю КНДР.
Лідары Кітая, Японіі і Паўднёвай Карэі дамовіліся пра мэту стварэння Карэйскага паўвострава, свабоднага ад ядзернай зброі. Мір служыць «нашым агульным інтарэсам і з'яўляецца нашай агульнай адказнасцю», адзначаецца ў заяве паводле вынікаў трохбаковага саміту ў Сеуле, апублікаванай у панядзелак, 27 траўня. Дэнуклеарызацыя Паўночнай Карэі і падтрыманне стабільнасці на Карэйскім паўвостраве з'яўляецца «супольнай зацікаўленасцю трох краінаў», заявілі ўдзельнікі сустрэчы.
Прэзідэнт Паўднёвай Карэі Юн Сок Ёль, прымаючы прэм'ера Дзяржрады КНР Лі Кэцяна і прэм'ер-міністра Японіі Фуміа Кісіду, звярнуўся да Паўночнай Карэі з перасцярогай ад выкарыстання тэхналогіі балістычных ракетаў пры запланаваным запуску новага спадарожніка. Гэта будзе парушэннем рэзалюцый ААН і «падарве рэгіянальны і глабальны мір і стабільнасць», указаў ён. Кісіда заклікаў Пхеньян адмовіцца ад запуску новага спадарожніка.
Нягледзячы на агульныя фармулёўкі рэзалюцыі, якія ўжо раней выкарыстоўваліся, у тым ліку Кітаем, кіраўніцтва КНДР рэзка раскрытыкавала вынікі саміту, заявіўшы пра «грубую палітычную правакацыю». Перамовы ў Сеуле «парушылі канстытуцыйны статус нашай краіны як дзяржавы, якая валодае ядзернай зброяй», заявіў прадстаўнік МЗС у Пхеньяне.
Трохбаковы саміт Японіі, Кітая і Паўднёвай Карэі стаў першай сустрэчай з 2019 года.