Крэмль адправіў інжынераў, каб дапамагчы КНДР з запускам шпіёнскіх спадарожнікаў
- 27.05.2024, 10:18
- 2,364
![Крэмль адправіў інжынераў, каб дапамагчы КНДР з запускам шпіёнскіх спадарожнікаў](https://i.c97.org/ai/271582/aux-head-1512622793-20171207_kndr_t.jpg)
Гэта адбылося пасля сустрэчы Пуціна і Кім Чэн Ына.
Вялікая колькасць расейскіх інжынераў і экспэртаў у касмічнай галіне прыбылі ў Паўночную Карэю, каб дапамагчы Пхеньяну падрыхтаваць запуск уласных выведвальных спадарожнікаў, распавялі паўднёвакарэйскаму агенцтву Yonhap дасведчаныя крыніцы ў вайсковых колах.
З іх слоў, гэта адбылося пасля таго, як Пуцін сустрэўся ў верасні мінулага года з паўночнакарэйскім лідарам Кім Чэн Ынам на Далёкім Усходзе Расеі. Падчас сустрэчы Пуцін, між іншым, паабяцаў дапамагчы КНДР у касмічнай сферы.
Расейскія адмыслоўцы выявілі праблемы ў ракеце-носьбіце і спадарожніку і на гэты момант спрабуюць выправіць непаладкі, якія ўзнікаюць з другой і трэцяй прыступкамі. З-за гэтага Пхеньян праводзіць больш выпрабаванняў рухавікоў ракеты, чым чакалася раней, адзначаюць крыніцы Yonhap.
У лістападзе 2023 года Паўночная Карэя запусціла свой першы спадарожнік-выведчык «Манрыген-1». Гэта адбылося пасля двух няўдалых спроб у траўні і жніўні. Аднак міністр абароны Паўднёвай Карэі Шын Вон-сік казаў, што спадарожнік, хоць і знаходзіцца на арбіце, відавочна, не працуе адпаведным чынам.
Пры гэтым Пхеньян паабяцаў вывесці на арбіту яшчэ тры спадарожнікі-шпіёны ў 2024 годзе. Адзін з іх КНДР можа запусціць у перыяд з 27 траўня да 4 чэрвеня, паведаміла японскае агенцтва Kyodo. Запуск ракеты-носьбіта са спадарожнікам будзе ажыццёўлены ў кірунку Усходне-Кітайскага мора і філіпінскай паўвыспы Лусон.