У iPhone раптоўна пачалі аднаўляцца старыя фота
12- 25.05.2024, 15:21
- 6,968
![У iPhone раптоўна пачалі аднаўляцца старыя фота](https://i.c97.org/ai/540692/aux-head-1679294738-20230320_iphone_360.jpg)
Гэта спарадзіла канспіралагічную тэорыю.
Пару тыдняў таму карыстальнікі iPhone сутыкнуліся з дзіўным багам: пасля абнаўлення да iOS 17/05 старыя фатаграфіі зноў пачалі з'яўляцца ў галерэі, праз гады пасля таго, як яны былі выдаленыя.
Гэта спарадзіла канспіралагічную тэорыю, што Apple насамрэч не выдаляе здымкі карыстальнікаў, а захоўвае іх у iCloud. У самой кампаніі да нядаўняга часу не каментавалі інцыдэнт, абмежаваўшыся выпускам апдэйту iOS 17.5.1, які выпраўляе памылку «паўторнага з'яўлення выдаленых фатаграфій».
У адказ на запыт 9to5Mac, Apple усё ж расказала, чаму некаторыя выдаленыя фатаграфіі вярнуліся на iOS 17/05, а эксперты праверылі гэтыя заявы.
![](https://i.c97.org/ai/596426/aux-1716639595-1.jpg)
Паведамляецца, што памылка была выкліканая не сэрвісам iCloud, а пашкоджанымі запісамі базы звестак у самой файлавай сістэме прылады. Як вынік, аперацыйная сістэма зноў пачынала бачыць фота, якія былі выдаленыя і не сінхранізаваныя з «воблакам». У некаторых выпадках выдаленыя здымкі маглі патрапіць на новыя iPhone пры пераносе звестак ці аднаўленні з рэзервовай копіі.
У Apple выправілі праблему з дапамогай апдэйту 17.5.1, але падкрэслілі, што абнаўленне не выдаляе аўтаматычна адноўленыя здымкі. Таму калі ў вас вылезла «прывітанне з мінулага» то трэба зайсці ў дадатак «Фатаграфіі» і выдаліць усё ўручную яшчэ раз.