24 лiпеня 2024, Серада, 6:48
Падтрымайце
сайт
Сім сім,
Хартыя 97!
Рубрыкі

СМІ: Пуцін загадаў ФСБ зачысціць каманду Шайгу

19
СМІ: Пуцін загадаў ФСБ зачысціць каманду Шайгу

Блізкія да Крамля крыніцы анансавалі арышты сотняў вайскоўцаў.

Беспрэцэдэнтная кампанія арышту высокапастаўленых расейскіх генералаў, якую запусцілі сілавікі пасля адстаўкі кіраўніка Мінабароны РФ Сяргея Шайгу, праходзіць са згоды Крамля. А яе найважнейшая прычына - гэта жаданне спецслужбаў сапхнуць на войска віну за няўдачы ва Украіне, а таксама атрымаць кантроль над вялізнымі бюджэтамі вайсковага ведамства.

Пра гэта The Moscow Times

«Ідзе цвёрдая зачыстка. ФСБ зачышчае каманду Шайгу. Гэта чаканы працэс. Сілавікі атрымалі дазвол на самым версе [у кіраўніцтве краіны]», — сказала крыніца, блізкая да Крамля.

«Да заканчэння чыстак яшчэ далёка. Нас чакаюць новыя арышты», - дадаў ён.

Супрацоўнікі спецслужбаў, адказныя за расследаванні карупцыі, з'явіліся ў комплексе будынкаў Міністэрства абароны на Фрунзенскай набярэжнай у Маскве яшчэ да таго, як стала вядома аб арышце намесніка міністра Цімура Іванова, аднаго з найбліжэйшых і даўніх паплечнікаў Шайгу. Са слоў крыніцы, блізкай да Мінабароны, гэта адбылося ў канцы красавіка, гэта значыць, калі Шайгу яшчэ заставаўся міністрам, але ўжо губляў уплыў.

«Цяпер там [у будынку Мінабароны] больш чэкістаў, чым вайскоўцаў, мне здаецца», - кажа суразмоўца The Moscow Times.

За два тыдні пасля звальнення Шайгу паводле крымінальных спраў, звязаных з карупцыяй, былі арыштаваныя ўжо чатыры высокапастаўленыя генералы расейскага войска. Увечары ў чацвер Следчы камітэт паведаміў аб пятым арыштаваным афіцэры.

Размова можа патэнцыйна ісці аб адной з «самых маштабных чыстак» у сучаснай расейскай гісторыі, і працэс толькі ўбіраецца ў сілу, сказаў дзейны чыноўнік расейскага ўрада.

«Я думаю, да канца года агулам ва ўсіх падраздзяленнях Мінабароны будуць арыштаваныя сотні людзей», - дадаў ён.

Са слоў іншага чыноўніка кабміна, матэрыялаў аб карупцыйных схемах у Мінабароны заўсёды «была процьма», і распачыналіся крымінальныя справы. «Але пакуль Шайгу быў міністрам і валодаў вялікім уплывам, следчым не дазвалялі даваць ім ход», – распавядае суразмоўца The Moscow Times.

Кампанія, на якую ФСБ атрымала дазвол у Крамлі, паказвае, што ва ўмовах ваеннага часу ў супрацьстаянні дзвюх вядучых у Расеі сілавых структур — войска і ФСБ — перамогу атрымліваюць спецслужбы, мяркуе крыніца, блізкая да Крамля.

«У правале ўварвання вінаваты мусіць быць нехта адзін. Гэта ці спецслужбы, якія займаліся выведкай і аналітычнай падрыхтоўкай вайны і абяцалі Пуціну трыумфальную аперацыю і хуткую перамогу. Але праваліліся. Альбо „другое войска свету“ пад кіраўніцтвам Шайгу, якое павінна была забяспечыць Пуціну перамогу. Але выявілася папяровым тыграм і пацярпела катастрофу», - тлумачыць суразмоўца The Moscow Times.

Пасля перастановак, якія пасля інаўгурацыі на пяты тэрмін зладзіў Пуцін, пасады пазбавіўся не толькі Шайгу, але і каардынатар спецслужбаў, сакратар Савета бяспекі Мікалай Патрушаў. Аднак ФСБ усё ж атрымлівае перамогу ў гэтым супрацьстаянні: яна можа атрымаць заахвочванне і ўзнагароды за «барацьбу з карупцыяй» у вышэйшых эшалонах улады.

«Задача максімум - паставіць сваіх людзей і кантраляваць самае смачнае, тыя кірункі, дзе ёсць вялікія бюджэты, - тлумачыць чыноўнік урада. — Ці вы сур'ёзна мяркуеце, што нехта з іх у гэты момант думае пра спецаперацыю?»

23 траўня стала вядома, што вайсковы суд у Маскве арыштаваў на два месяцы начальніка Галоўнай управы сувязі Узброеных сіл Расеі - намесніка начальніка Генштаба генерал-лейтэнанта Вадзіма Шамарына. СК абвінавачвае яго ў атрыманні хабару ў суме 36 мільёнаў рублёў.

У сярэдзіне траўня быў узяты пад варту начальнік Галоўнай управы кадраў Мінабароны Юры Кузняцоў паводле падазрэння ў атрыманні хабару ў суме 30,5 млн руб.

А ў канцы красавіка, незадоўга да адстаўкі Шайгу з пасады міністра абароны, паводле такога ж артыкула быў арыштаваны і адпраўлены ў СІЗА намеснік міністра абароны Цімур Іваноў. Яго абвінавачваюць у атрыманні хабару ў суме 1,185 млрд руб.

Акрамя таго, былі арыштаваныя былы камандзір 58-й арміі Паўднёвай вайсковай акругі генерал Іван Папоў (яго абвінавачваюць у махлярстве) і кіраўнік дэпартамента забеспячэння дзяржзаказу Мінабароны Уладзімір Верцялецкі.

Напісаць каментар 19

Таксама сачыце за акаўнтамі Charter97.org у сацыяльных сетках