У Беларусі расце колькасць ДТЗ з удзелам дзікіх жывёл
5- 24.05.2024, 14:47
- 8,968
![У Беларусі расце колькасць ДТЗ з удзелам дзікіх жывёл](https://i.c97.org/ai/596308/aux-head-1716551215-20240524_los_360.png)
Лідарамі з'яўляюцца дзве вобласці.
У Беларусі расце колькасць ДТЗ з удзелам дзікіх жывёлін. Такая сітуацыя паўтараецца з году ў год.
Пра гэта расказаў намеснік начальніка аддзела кантролю за аховай і выкарыстаннем аб'ектаў жывёльнага і расліннага свету Дзяржаўнай інспекцыі аховы жывёльнага і расліннага свету Сцяпан Гузней, перадае карэспандэнт БелТА.
«Неабходна адзначыць, што звесткі паказваюць на тэндэнцыю штогадовага росту фактаў падобных ДТЗ. Калі ў 2021 годзе было зарэгістравана 2 978 фактаў, то ў 2022-м - ужо 3 012 выпадкаў. Летась статыстыка зафіксавала 3374 ДТЗ з удзелам паляўнічых жывёл. За чатыры месяцы гэтага года адзначана 1 040 аварый, у выніку якіх загінулі 1 057 жывёлін. Рост у параўнанні з 2023 складае 9%. Тэндэнцыя росту захоўваецца і зараз», - адзначыў прадстаўнік Дзяржінспекцыі.
Дзе і калі адбываюцца такія ДТЗ?
Часцей за ўсё аварыі з дзікімі жывёламі адбываюцца ў Менскай і Гарадзенскай абласцях.
«У прысталічным рэгіёне летась зафіксавана 956 фактаў, што складае каля 30% ад агульнай колькасці. У Гарадзенскай вобласці адзначана 580 ДТЗ або 17 адсоткаў. Найменшая колькасць такіх ДТЗ фіксуецца ў Берасцейскай вобласці - 380 выпадкаў. Найбольшая колькасць аварый адбываецца ў другім і чацвёртым кварталах года. Што тычыцца часу дня, то часцей інцыдэнты адбываюцца ўночы», – падкрэсліў спецыяліст.
У выпадку выяўлення загінулых або параненых жывёл, чалавек павінен па магчымасці апавясціць карыстальніка землеўгоддзяў або звярнуцца ў мясцовае аддзяленне ўнутраных спраў.
«Заканадаўствам забараняецца самавольная здабыча, разбор, транспартаванне і іншыя маніпуляцыі. Парушэнне цягне за сабой адміністрацыйную або крымінальную адказнасць», - сказаў на заканчэнне Сцяпан Гузней.