Forbes: Украінскія дэсантнікі на Stryker трымаюць кругавую абарону ў Ваўчанску
5- 24.05.2024, 12:14
- 11,418
![Forbes: Украінскія дэсантнікі на Stryker трымаюць кругавую абарону ў Ваўчанску](https://i.c97.org/ai/466222/aux-head-1651660098-20220504_stryker_360.jpg)
Амерыканская зброя ідэальна пасуе для такога тыпу бою.
У пачатку 2023 ЗША перадалі Украіне амаль 200 баявых машын Stryker. Амаль усю тэхніку атрымала новая элітная 82-я дэсантна-штурмавая брыгада ўкраінскіх Паветрана-дэсантных войскаў. Цяпер яны ваююць у Ваўчанску.
Як піша Forbes, гэта ўпершыню, калі гэтыя ББМ выкарыстоўваюцца на полі бою, для якога былі створаны. Размова ідзе аб гарадскіх баях.
На фоне баёў на поўначы Харкаўскай вобласці пачалі хадзіць чуткі, што 82-я дэсантна-штурмавая брыгада спяшаецца ўзмацніць гарнізон у Ваўчанску. У аўторак байцы пацвердзілі сваё разгортванне на новых пазіцыях. На відэа з БПЛА і камер з шаломаў бачна, што ўкраінскія дэсантнікі ўступаюць у бой у цэнтры Ваўчанска. Адзін салдат нават стрэліў супрацьтанкавай ракетай з адкрытага верхняга люка «Страйкера».
«Задача ў тым, каб заняць абарончыя пазіцыі і стрымаць ворага», - сказаў адзін з дэсантнікаў у асобным відэа.
Гарадскія баі ў Ваўчанску
Як зазначаецца, байцам на гэтых ББМ варта пазбягаць прамога бою з расейскай механізаванай або танкавай брыгадай, асабліва на адкрытай мясцовасці, дзе больш цяжкія танкі і гусенічныя баявыя машыны могуць прымяніць сваю пераўзыходзячую агнявую моц на вялікай далёкасці.
Летась 82-я дэсантна-штурмавая брыгада ўпершыню ўступіла ў бой супраць акапаных расейскіх механізаваных сіл на адкрытых палях поўдня Украіны. Брыгада страціла прынамсі восем сваіх ББМ, што аналітыкі Oryx змаглі праверыць.
Калі паўднёвы фронт стабілізаваўся, а расейцы засяродзілі свае сілы на ўсходзе і поўначы гарадоў, 82-я дэсантна-штурмавая брыгада нарэшце атрымала магчымасць весці баі на выгоднай мясцовасці.
Імкнучыся прайсці праз Ваўчанск, каб вызваліць шлях у Харкаў, новая паўночная групоўка сіл расейскага войска пачала штурмы пяхотай.
«Штурмавыя групы, як правіла, памерам да ўзводаў [да 40 вайскоўцаў], уступаюць у баявыя дзеянні з апорным пунктам перад аб'яднаннем з іншымі штурмавымі групамі. Гэта змяншае страты пры набліжэнні да мэты, але запавольвае тэмп прасоўвання», - растлумачылі ва Украінскім цэнтры абаронных стратэгій.
Кругавая абарона байцоў УСУ
Узводы расейцаў былі раскіданыя па гарадской шэрай зоне ў цэнтры Ваўчанска, размываючы лінію фронту і прымушаючы экіпажы ўкраінскіх «Страйкераў» весці бой на 360 градусаў.
«Мы трымалі кругавую абарону. Яны ішлі з усіх бакоў», - сказаў адзін з дэсантнікаў.
На шчасце, Strykers падыходзіць для кругавога бою. Гэтыя машыны з'яўляюцца добрымі платформамі для назірання і стральбы, а дзякуючы датчыкам і зброі, усталяваным зверху, акупантам цяжка падкрасціся да іх.
Што яшчэ важней, кожны «Страйкер» нясе цэлы атрад з дзевяці пяхотнікаў. Такім чынам, група з чатырох ББМ можа разгарнуць поўны ўзвод з амаль 40 пяхотнікаў, чаго не могуць цяжкія і менш умяшчальныя гусенічныя машыны М-2.
На думку журналістаў выдання, ужо відавочна, што 82-я дэсантна-штурмавая брыгада была гатовая да гарадскога бою ў Ваўчанску. Прасунуўшыся на некалькі кіламетраў на поўдзень у першыя дні наступу на поўначы, расейцы наткнуліся на ўзмоцненую ўкраінскую абарону ў цэнтры горада.
Сутыкненне з магутным гарнізонам, у тым ліку з дэсантнікамі, якія нядаўна прыбылі, і іх колавай тэхнікай, амаль цалкам спыніла прасоўванне варожых сіл.
«Ёсць прыкметы таго, што расейскія войскі працягваюць пранікаць у лясы і асобныя будынкі на поўдзень, спрабуючы замацавацца. Аднак мы скептычна ставімся да іх здольнасці прасоўвацца глыбока [на] поўдзень», - адзначыла ўкраінская аналітычная група Frontelligence Insight.