Паранены прэм'ер Славакіі Фіца ў стабільным, але цяжкім стане
4- 18.05.2024, 16:44
- 2,088
![Паранены прэм'ер Славакіі Фіца ў стабільным, але цяжкім стане](https://i.c97.org/ai/595253/aux-head-1715847708-20240326_foto2_360.jpg)
Урад пакуль будзе працаваць без яго.
Славацкі прэм'ер-міністр Роберт Фіца да гэтага часу знаходзіцца ў лякарні, пасля замаху на яго. Ягоны стан застаецца цяжкім.
Пра гэта паведамляе РБК-Украіна са спасылкай на Aktuality.sk.
Паводле словаў міністра абароны Роберта Каліняка, праз цяжкі стан прэм'ера перавод яго ў Браціславу будзе немагчымы яшчэ ў найбліжэйшыя дні.
– Тое самае датычыцца прапановаў з-за мяжы, якія мы вельмі цэнім, – дадаў ён.
Паводле словаў Каліняка, у апошнія дні ў Банскай Быстрыцы адбылося некалькі цудаў рукамі лекараў, медсясцёр і ўсяго персаналу лякарні Рузвельта, куды шпіталізаваны Фіца пасля таго, як ён быў паранены ў мінулую сераду.
– Я не магу знайсці словаў, каб падзякаваць вам за тое, што мы набліжаемся да станоўчага прагнозу. Ягоны стан дазваляе рэгенерацыю, спадар прэм'ер-міністр, вядома, усведамляе ўсе межы, якія ўяўляе такая сур'ёзная траўма, – сказаў міністр.
Як будзе працаваць урад Славакіі без Фіца
Ён таксама расказаў, як будзе выглядаць кіраванне дзяржавай падчас шпіталізацыі прэм'ер-міністра.
– Мы дамовіліся, што ўрад будзе прадаўжаць тую праграму, якую ён вызначыў. Гэта значыць, што на наступным тыдні будзе сама меней два паседжанні ўраду, адно стандартнае і адно пазачарговае, праз перамовы па еўрафондах. Набліжаецца тэрмін унясення законаў у парламент, таму дзяржава павінна прадаўжаць функцыянаваць, – дадаў Каліняк.
Міністр таксама дадаў, што ў кааліцыі ёсць усе паўнамоцтвы, якія цяпер неабходныя для забеспячэння функцыянавання дзяржавы.
– Віцэ-прэм'еры для гэтага і ёсць, ці законы падпісваць, ці нешта іншае, у нас ёсць усе гэтыя паўнамоцтвы, – сказаў ён.
Нагадаем, у сераду, 15 траўня, на прэм'ер-міністра Славакіі рабілі замах. Мужчына стрэліў у Фіца блізу 4 разоў з агнястрэльнай зброі. Прэм'ера тэрмінова даставілі ў лякарню з дапамогай гелікаптэра.
Учора прайшла ўжо другая аперацыя, якая павінна палепшыць стан Фіца. Аднак лекары да гэтага часу адзначаюць, што стан прэм'ера цяжкі.