Беларусам стане складаней увесці ў ЕЗ свойскую жывёлу
3- 18.05.2024, 15:50
- 6,042
![Беларусам стане складаней увесці ў ЕЗ свойскую жывёлу](https://i.c97.org/ai/556051/aux-head-1689492943-20230716_kot_360.jpg)
Будзе патрэбны яшчэ адзін дакумент.
Правілы ўвозу свойскай жывёлы ў краіны Еўразвязу з Беларусі і Расеі неўзабаве стануць больш строгімі. З 16 верасня 2024 года жывёла, якая ўвозіцца, павінна будзе прайсці сералагічнае даследаванне на антыцелы да віруса шаленства і атрымаць дакумент, які пацвярджае гэта.
Пра гэта паведамілі Delfi у Дзяржаўнай харчова-ветэрынарнай службе (ДХВС) Літвы.
- Расея і Беларусь выключаныя са спісу краін, якія эфектыўна рэалізуюць антырабічныя патрабаванні. Летась 63 жывёліны, якія перавозіліся ў камерцыйных мэтах, не былі дапушчаныя ў Літву з-за неадпаведнасцей суправаджальных дакументаў, умоў перавозкі або ідэнтыфікацыйнага нумара жывёлы, — расказала галоўная дзяржаўная ветэрынарка Дэпартамента памежнага кантролю Літвы Аліцыя Заранковіч.
З гэтага часу для ўвозу ў Еўразвяз сабак, катоў або тхароў з Беларусі і Расеі неабходна праводзіць тэст на антыцелы да шаленства, адзначыла яна.
У ведамстве таксама падкрэслілі, што ўзор тэсту на антыцелы да шаленства неабходна ўзяць як мінімум праз 30 дзён пасля вакцынацыі супраць шаленства і як мінімум за 3 месяцы да выдачы ветэрынарнага сертыфіката і ўезду ў ЕЗ. Такім чынам, ён павінен праводзіцца ў зацверджанай лабараторыі, а вынік павінен паказваць узровень антыцелаў, якія нейтралізуюць вірус шаленства, не менш за 0,5 МЕ/мл.
Акрамя таго жывёлы павінны мець ветэрынарны сертыфікат узору Еўрапейскага звязу, выдадзены дзяржаўным ветэрынарам трэцяй краіны.
Пры ўвозе з Беларусі і Расеі ў Еўрапейскі звязу жывёліна таксама павінна мець падскурны мікрачып або татуіроўку (зробленую да 3 ліпеня 2011 года) і быць прышчэпленая ад шаленства (першасная вакцынацыя жывёлы не маладзейшая за 12 тыдняў).
Выхаванец з Беларусі або Расе, якому ў ЕЗ быў выдадзены Пашпарт свойскай жывёлы для ўвозу ў ЕЗ, таксама павінен мець падскурны мікрачып або тату, быць прышчэпленым ад шаленства, а з 16 верасня 2024 года павінна быць прадастаўлена інфармацыя аб тым, што жывёла была сералагічна правераная на антыцелы да шаленства перад выездам з ЕЗ.