AFP: Новая дапамога ЗША дасць Украіне магчымасць перахапіць ініцыятыву

Узбраенне ўжо пачало паступаць.

Новая вайсковая дапамога Злучаных Штатаў, разблакаваная пасля пастановы Кангрэса, дапаможа Узброеным cілам Украіны з часам вярнуць ініцыятыву на полі бою, але шырокамаштабны ўкраінскі наступ у найбліжэйшы час малаімаверны.

Аб гэтым журналістам 25 красавіка заявіў амерыканскі чыноўнік на ўмовах ананімнасці, паведамляе AFP.

Новы пакет вайсковай дапамогі ЗША коштам 1 мільярд даляраў быў абвешчаны пасля шматмесячнага перапынку, падчас якога расейскія сілы развярнулі маштабнае наступленне на ўсходзе Украіны.

«Украінскія войскі ўжо працяглы час нармуюць свае боепрыпасы, нармуюць свае рэсурсы. Таму расейскія войскі, фактычна, перахапілі ініцыятыву», - пракаментаваў чыноўнік амерыканскага абароннага ведамства.

На яго думку, дапамога з боку ЗША і іншых краін «дазволіць украінцам пачаць перахапляць ініцыятыву», але «гэта не будзе хуткім працэсам».

«Украінцам трэба будзе дастаткова моцна перабудавацца, каб прыняць усе гэтыя новыя пастаўкі...і забяспечыць абарону сваіх пазіцый. Таму я б не прагназаваў ніякага шырокамаштабнага наступу ў найбліжэйшай перспектыве», - дадаў чыноўнік.