Шольц падтрымаў ідэі Макрона аб абароне Еўропы

Канцлер Нямеччыны адзначыў «добрыя імпульсы» ў прамове прэзідэнта Францыі.

Канцлер Нямеччыны Олаф Шольц падтрымаў ідэі прэзідэнта Францыі Эмануэля Макрона, якія той выказаў у сваёй прамове ва ўніверсітэце Сарбоны ў чацвер, 25 красавіка.

«Францыя і Нямеччына разам хочуць, каб Еўропа заставалася моцнай. Ваша прамова змяшчае добрыя імпульсы для дасягнення гэтага. Разам мы прасоўваем ЕЗ наперад: палітычна і эканамічна. За суверэнны і інавацыйны ЕЗ! Няхай жыве Еўропа!» - напісаў Шольц Макрону на сваёй старонцы ў сацсетцы X.

Раней Макрон, у тым ліку падкрэсліў, што ва ўмовах, калі суседзі пачалі праяўляць агрэсію, Еўропе неабходна стварыць для сябе надзейную канцэпцыю абароны. «Гэта тое, што нам неабходна зрабіць тэрмінова, і гэта новая парадыгма ў галіне абароны, - падкрэсліў Макрон. - Еўропа павінна быць у стане абараніць тое, што ёй дорага, разам са сваімі хаўруснікамі, калі яны будуць гатовыя зрабіць гэта разам з намі, а пры неабходнасці і ў адзіночку».

«Калі ў нас ёсць сусед, які стаў агрэсіўным, (...) які валодае балістычным патэнцыялам, куды за апошнія гады ён укараніў шмат інавацый (...), валодае ядзернай зброяй і прадэманстраваў свае магчымасці, становіцца зразумела, што нам неабходна стварыць стратэгічную канцэпцыю надзейнай еўрапейскай абароны», - заявіў французскі прэзідэнт.

Вайну Расеі ва Украіне Макрон назваў «галоўнай пагрозай для еўрапейскай бяспекі сёння». «Моцная Еўропа - гэта Еўропа, якая карыстаецца павагай і гарантуе сваю бяспеку, - працягнуў ён. - Гэта Еўропа, якая прызнае, што ў яе ёсць межы, і абараняе іх. Гэта Еўропа, якая бачыць рызыкі для сябе і рыхтуецца да іх».