Церцель палохае Лукашэнку атакай літоўскіх беспілотнікаў на Менск

Літоўскія ўлады назвалі гэта трызненнем.

Беларускія спецслужбы нібыта «прадухілілі ўдары беспілотнікаў з тэрыторыі Літвы па аб'ектах у Менску». Пра гэта заявіў кіраўнік КДБ Іван Церцель 25 красавіка на «ўсебеларускім народным сходзе».

- У Літве і Польшчы радыкалы вырабляюць баявыя дроны для нанясення ўдараў па крытычна важных аб'ектах на тэрыторыі Беларусі, - заявіў Іван Церцель.

Са слоў кіраўніка КДБ, «суседняя Літва стала месцам базавання віленскай харугвы», дзе «пад кіраўніцтвам радыкалаў» і «ў непасрэдным кантакце з літоўскім парамілітарным фармаваннем «Клуб стралкоў» распрацоўваюць планы заходу для ўчынення тэрактаў на тэрыторыю прылеглых да Літвы Ашмянскага, Браслаўскага раёнаў, перакіданні і арганізацыі ў Беларусі схованак са зброяй, выбуховымі рэчывамі і іншымі сродкамі паразы».

«КДБ ва ўзаемадзеянні з калегамі з іншых структур у апошні час праведзены шэраг вострых чэкісцкіх мерапрыемстваў, які дазволіў прадухіліць нанясенне ўдараў баявымі дронамі з тэрыторыі Літвы па аб'ектах у Менску і яго прадмесцях. Працу ў гэтым кірунку працягваем, дэталёвую інфармацыю агучыць грамадскасці пакуль не маем магчымасці», — сказаў Церцель.

У Літве пракаментавалі заяву Церцеля пра «атаку беспілотнікаў»

Прадстаўнік стратэгічных камунікацый літоўскага войска Гінтаўтас Чуніс назваў гэта дэзінфармацыяй, піша LRT.

- 100%, што гэта дэзінфармацыя, - сказаў Гінтаўтас Чуніс. - Што Літва ажыццявіць атаку беспілотнікам на Беларусь - гэта нонсэнс, іншага слова я не магу падабраць.

Спікер дадаў, што падобныя заявы з боку беларускіх чыноўнікаў выклікаюць у яго «толькі ўсмешку».

Прадстаўніца камандзіра літоўскім войскам Жывіле Дыджгалвене таксама зняпраўдзіла інфармацыю, якая распаўсюджваецца кіраўніком КДБ.

- Варожая інфармацыйная дзейнасць характарызуецца дэзінфармацыяй і фальшывімі абвінавачваннямі. Літоўскае войска не рабіла і не робіць ніякіх варожых дзеянняў супраць іншых краін, - сказала Жывіле Дыджгалвене.