«Белпошта» паклікала на працу афіцыянтаў і рознарабочых

Які заробак прапанавала?

Рэспубліканскае ўнітарнае прадпрыемства «Белпошта» ў аўторак, 23 красавіка, агучыла новы спіс вакансій. Аднак беларусам прапанавалі працу, зусім не звязаную непасрэдна з працай паштовай службы. На гэты раз прадпрыемства шукае афіцыянтаў і рознарабочых. Даведаліся, дзе менавіта трэба будзе працаваць і які заробак прапанавалі прэтэндэнтам.

Афіцыянты і рознарабочыя «Белпошце» спатрэбіліся на базе адпачынку «Дружба», размешчанай у Менскім раёне. Патэнцыйным супрацоўнікам паабяцалі «своечасовую аплату працы» — два разы на месяц і сацыяльны пакет, які ўключае ў сябе, у ліку іншага, медыцынскую страхоўку, матэрыяльную дапамогу на аздараўленне да адпачынку, а таксама зніжкі на туры на базу адпачынку.

Калі з абавязкамі афіцыянта ўсё зразумела і без тлумачэнняў, то з другой вакансіяй трэба разабрацца падрабязней. У абавязкі «працоўных у комплексным абслугоўванні будынкаў і збудаванняў» уваходзяць, напрыклад, наступныя працы:

• агляд тэхнічнага стану будынкаў і збудаванняў, абсталявання і механізмаў,

• правядзенне рамонтна-будаўнічых работ,

• прыборка тэрыторыі базы ад смецця,

• пакос газона.

За ўсё гэта «Белпошта» прапанавала «чысты» заробак ад 1 100 рублёў (максімальна магчымую суму выплат не агучылі). Мінімальны заробак афіцыянтам паабяцалі ў 940 рублёў на рукі. Пры гэтым на прадпрыемстве запэўнілі, што ў іх супрацоўнікаў ёсць «магчымасць прафесійнага росту і развіцця».