У краінах Еўропы арыштаваныя пяць абвінавачаных у шпіянажы на Кітай
8- 22.04.2024, 20:10
- 3,104
![У краінах Еўропы арыштаваныя пяць абвінавачаных у шпіянажы на Кітай](https://i.c97.org/ai/510511/aux-head-1660039787-20220809_china-spy_360.jpg)
Тры чалавекі ў Нямеччыне і два ў Вялікай Брытаніі.
Пяць чалавек, якія абвінавачваюцца ў шпіянажы на карысць Кітая, трапілі ў панядзелак у поле зроку еўрапейскіх праваахоўных органаў. Трое былі арыштаваныя ў Нямеччыне. Нямецкія ўлады мяркуюць, што яны перадавалі кітайскаму боку засакрэчаную інфармацыю пра высокія тэхналогіі, якія ўжываюцца на флоце.
Усе трое арыштаваныя – грамадзяне Нямеччыне. Адзін з іх, на думку следства, быў завербаваны кітайскімі спецслужбамі. Два іншыя – уладальнікі фірмы, звязанай з тэхналагічнымі распрацоўкамі, – выкарыстоўваліся ў якасці крыніцаў інфармацыі.
Міністарка ўнутраных справаў ФРГ Нэнсі Фезер і міністр юстыцыі Марка Бушман заявілі, што актыўнасць выведак Кітая ў галіне бізнэсу, прамысловасці і навукі ў апошні час расце, і Нямеччыне трэба праяўляць больш насцярожанасці ў гэтым сэнсе.
Таксама ў панядзелак у Вялікай Брытаніі двум раней арыштаваным грамадзянам краіны былі абвешчаныя абвінавачанні ў шпіянажы на карысць Кітая. На меркаванне праваахоўных органаў, яны перадавалі кітайскім спецслужбам сакрэтную інфармацыю. Адзін з падазраваных працаваў асістэнтам у брытанскім парламенце, пра заняткі другога не паведамляецца.
Меркаванняў пра сувязь нямецкіх і брытанскіх падазраваных паміж сабой не прыводзіцца.