Вайсковы эксперт: Расейскія акупанты заганяюць сябе ў пастку
1- 22.04.2024, 17:35
- 6,282
![Вайсковы эксперт: Расейскія акупанты заганяюць сябе ў пастку](https://i.c97.org/ai/464497/aux-head-1650605014-20220420_ork_360.jpg)
Наступ расейцаў павернецца для іх няўдачай.
Калі на гэты момант ва Узброеных сілаў Украіны адчуваецца недахоп зброі і боепрыпасаў, то неўзабаве сітуацыя ў корані зменіцца, нагадаў палітычны эксперт, кіраўнік украінскага Цэнтра вайскова-прававых даследаванняў Аляксандр Мусіенка. Пакуль вайсковая дапамога ад ЗША ва Украіну не прыйшла, супраціўнік спрабуе наступаць на розных кірунках, але вораг апынецца загнаным у пастку, калі колькасць узбраення і набояў у Сіл абароны павялічыцца ў разы.
Вайсковы эксперт патлумачыў, як улады РФ павінны былі адрэагаваць на выдзяленне дапамогі Украіне ад ЗША:
- Што я магу сказаць? Што ўсё ідзе не паводле расейскага плану. Паводле расейскага плану было так, каб Украіна дапамогу не атрымала, і зараз ім трэба апраўдаць атрыманне дапамогі. Калі б у Расеі было нармальнае палітычнае кіраўніцтва, а не Пуцін, дык якую пастанову яно павінна было б прыняць у гэтай сітуацыі? Яно павінна было б прыняць пастанову адмовіцца ад планаў актывізаваць наступальныя дзеянні, бо сітуацыя змянілася, бо з'явіўся аспект, які не быў улічаны ці быў праігнараваны: аспект узмацнення падтрымкі і дапамогі Украіне.
Потым кіраўнік Цэнтра вайскова-прававых даследаванняў дадаў:
- Калі аспект падтрымкі і дапамогі з'яўляецца ў гэтым ураўненні, то тое, што Расея планавала, не спрацоўвае ў гэтым ураўненні. Яны разлічвалі, што Захад слабы і Захад здасца, і думалі, што ЗША не прагаласуюць і будуць цягнуць да лістапада, а тут сітуацыя мяняецца. ЗША падалі пакет падтрымкі і ўжо кажуць, што гэта неўзабаве будзе паступаць ва Украіну. Вядома, гэта разбурае шмат планаў ворага.
- Цяпер яны кажуць, што ўсё адно ідуць на Харкаў і дасягнуць вынікаў: яны ж не могуць сказаць, што раздумаліся, бо Украіна атрымала падтрымку. Для іх гэта будзе праявай слабасці, таму яны гавораць, што не адмаўляюцца ад сваіх планаў, бо Украіна аслабленая, сіл і сродкаў недастаткова. Я мяркую, няхай так і думаюць і няхай ідуць у гэтую пастку: калі яны надумалі ісці ў гэтую пастку, то няхай ідуць туды цалкам. Я думаю, з тым, што мы атрымаем падтрымку і дапамогу, у нас павялічацца шанцы стварыць гэтую пастку для ворага, - спрагназаваў далейшыя падзеі на фронце Аляксандр Мусіенка.