У Швэцыі зацікавіліся загадкавым танкерам бізнэсмэнаў, звязаных з Лукашэнкам

Яны дзесяцігоддзямі займаліся гандлем нафтай.

Уладальнікамі нафтавага танкера Zircone ля берагоў швэдскага вострава Готланд з'яўляюцца расейскі алігарх і латвійскі нафтавы магнат, якія былі заўважаныя ў гандлі нафтай з Лукашэнкам, піша SVT. Раней тэлекампанія сцвярджала, што кожны дзень з карабля перапампоўваецца паліва для расейскага ценевага флоту.

Некалькі швэдскіх установаў высвятляюць, ці можна спыніць аперацыю.

Паводле звестак рэсурсу, латвійская кампанія Fastbunkering з 2022 года прадала паліва больш чым 500 караблям, амаль усе яны ішлі ў Расею ці з Расеі. Аперацыі адбываюцца ў моры, і многія з задзейнічаных караблёў з'яўляюцца старымі і экалагічна небяспечнымі, гаворыцца ў матэрыяле.

Уладальнікамі кампаніі, зарэгістраванай у латвійскім рэестры прадпрыемстваў, з'яўляюцца грамадзянін Латвіі Аляксей Чулец і Сяргей Пастэрс, які мае расейскае і мальтыйскае грамадзянства, сцвярджаюць аўтары.

Як піша рэсурс, яны дзесяцігоддзямі займаліся гандлем нафтай, а ў 2022 годзе журналісцкае расследаванне выявіла іх ключавую ролю ў экспарце нафтапрадуктаў, якія трапілі пад санкцыі з Беларусі.