Менчук атрымаў штраф за няпройдзены тэхагляд там, дзе не чакаў

«Сумны фінансавы досвед».

Пра тое, што трапіцца на камеру фотафіксацыі можна не толькі за парушэнне хуткаснага рэжыму, але і за адсутнасць тэхагляду, кіроўцы ведаюць ужо даўно. Спачатку хадзілі чуткі, што гэта ўзаемазвязаныя гісторыі: трапіўся за перавышэнне - правераць і тэхагляд.

Але яшчэ летам мінулага года сумневы адпалі: ёсць камеры, якія маніторыць менавіта ТА, таму ліст шчасця можа атрымаць і той кіроўца, які занадта хутка не ездзіў. Такі ліст атрымаў чытач «Онлайнера» Вадзім, прычым трапіўся ён там, дзе ніяк не чакаў.

- Высвятляецца, на вуліцы Веры Харужай у Менску ёсць камера, якая счытвае непройдзены тэхагляд. Размешчаная яна каля ГЦ «Сілуэт». Хутчэй за ўсё, яна працуе па аўторках у першай палове дня. Бо нядаўна атрымаў яшчэ адно SMS-апавяшчэнне пра «ліст шчасця», а праязджаў там жа ў аўторак. Такія справы з сумным фінансавым досведам, - адзначыў аўтамабіліст.

Пастанова, якую атрымаў Вадзім, не пакідае сумневаў што да месца: Менск, вуліца Веры Харужай, паблізу д. 1а, ГЦ «Сілуэт». Да аплаты - 20 рублёў.

Раней трапляліся «лісты шчасця» з камеры на вуліцы Багдановіча, паблізу вуліцы Зыбіцкай, з вуліцы Нямігі, паблізу дома №5, з трасы Р1.

Прычым, што характэрна, у «Бяспечных дарогах Беларусі» не робяць сакрэту з таго, дзе менавіта размешчаны камеры, якія адсочваюць наяўнасць ТА. На сайце арганізацыі апублікаваная мапа з такімі прыборамі, журналісты іх налічылі чатыры ў межах МКАД, яшчэ камеры ўсталяваныя ў Ждановічах і ў Копішчы («Новая Баравая»).

Разам з тым пазнача, што акрамя пералічанага абсталявання ў сістэме маніторынгу транспартнага плыні выкарыстоўваюцца звесткі, атрыманыя са стацыянарных і мабільных датчыкаў кантролю хуткасці і сістэм вылічэння сярэдняй хуткасці, гэта значыць фактычна прыбораў, якія фіксуюць аўтамабілі з няпройдзеным тэхаглядам, значна больш.