Генштаб Эстоніі: Войска РФ выкарыстоўвае «тактыку амёбы»

Праз адсутнасць магчымасцяў для вялікага прарыву акупанты спрабуюць эксперыментаваць.

Кіраўнік Генеральнага штаба Сіл абароны Эстоніі Эна Мітс заявіў, што войска РФ выкарыстоўвае так званую «тактыку амёбы» ў вайне супраць Украіны. Паводле ягоных слоў, праз адсутнасць магчымасцяў для вялікага прарыву акупанты спрабуюць эксперыментаваць з невялікімі сіламі ўсюды і спадзяюцца, што недзе з'явіцца шанц для прарыву.

Пра гэта паведамляе ERR.

«Расейцы самі выкарыстоўваюць тое, што можна назваць «тактыкай амёбы». Свядома ці не, але, як я ўжо сказаў, у іх няма магчымасцяў для глыбокага прарыву, але яны ціснуць усюды, нягледзячы на жыццё сваіх салдат, на тэхніку, якая, так бы мовіць, гарыць, і спадзяюцца, што недзе, раптам, з'явіцца магчымасць. Гэта іх мадэль паводзін, якая характэрная не толькі для іх дзеянняў на полі бою, але, можна сказаць, у глабальным маштабе», - адзначыў кіраўнік Генштаба Эстоніі.

Эна Мітс таксама адзначыў, што хаця Расея і наносіць удары па Харкаве, але ў яе няма магчымасці ўзяць горад.

«Яна можа прабіцца да горада адным махам, але для таго, каб утрымаць яго пад кантролем, спатрэбіцца значна больш войскаў. Гэта тое, што Расея робіць. І гэта менавіта тое, чаго сёння не стае расейцам. Мы бачым, што яны, так бы мовіць, нарошчваюць войскі - факт у тым, што сёння ва Украіне іх больш, чым два гады таму - але зноў жа, узровень іх падрыхтоўкі і ўзровень камандавання з'яўляецца нізкім, на ўзроўні роты. У апошнія тыдні яны таксама спрабавалі камбінаваць ротныя бранятанкавыя атакі, але гэта дастаткова адзінкавыя выпадкі», - растлумачыў ён.