Работнік музея ў Мюнхене выставіў у галерэі ўласную карціну

Мужчына жадаў дасягнуць «мастацкага прарыву».

Мужчына, які працаваў мантажнікам у мастацкім музеі Мюнхена Pinakothek der Moderne, самавольна павесіў сваю карціну ў галерэі, дзе выстаўляюць працы Эндзі Уорхала. Работнік хацеў дабіцца свайго «творчага прарыву». Пра гэта паведамляе The Guardian.

«Супрацоўнік уважае сябе за мастака і, хутчэй за ўсё, прымаў сваю ролю ў групе мантажнікаў музея як штодзённую працу, каб падтрымліваць сваё сапраўднае пакліканне», - сказаў прадстаўнік мастацкага музея.

51-гадовы работнік музея меў доступ у галерэю ў непрацоўны час, таму не прыцягнуў асаблівай увагі целаахоўнікаў, калі ўсталёўваў свой твор мастацтва памерам 60 см на 120 см на пустой белай сцяне ў калідоры на першым паверсе ўсходняга крыла.

Колькі часу карціна вісела на сцяне, незразумела. Але ў Pinakothek der Moderne мяркуюць, што гэта было не надта доўга.

«Кіраўнікі адразу заўважаюць нешта такое», – кажа прэс-сакратар Ціне Нелер.

У музеі адмовіліся каментаваць тэму ці стыль карціны, каб не заахвочваць «імітатараў-жартаўнікоў».

«Мы не атрымалі ніводнага станоўчага водгуку на карціну ад наведвальнікаў галерэі», — сказаў прэс-сакратар.

Музей скасаваў кантракт з тэхнічным работнікам і забараніў яму наведваць галерэю. Акрамя таго, паліцыя пачала расследаванне праз наўмыснае пашкоджанне маёмасці. Бо, каб павесіць карціну, мужчына зрабіў дзве дзіркі ў сцяне галерэі.